(මීරිගම විශේෂ පුෂ්පකුමාර මල්ලවආරච්චි)
ලොවම දන්නා ආයතනයක සේවක පිරිසක් වෙනුවෙන් පැවැත්වූ වැඩමුළුවකි. පැවැත්වුණේ අගනගරයට නුදුරු පෙදෙසකය. දිවයින පුරා ගම්මාන නියෝජනය කරමින් හැටකට වැඩි පිරිසක් මීට එක්ව සිටියහ.

මෙම වැඩමුළුව විශේෂ දේශනයට පැමිණ සිටියේ ප්‍රසිද්ධ දේශකයෙකි. හෙතෙම මේ ආයතනයට සම්බන්ධ අයෙකු නොවේ. වැඩමුළුව අතරතුර මේ දේශකයා පුංචි තිරයේ වදන් පෙළක් දර්ශණය කළේය. එහි වටිනා අදහසක් ගැබ්ව තිබිණි.

මේ ප්‍රකාශය කා විසින් කරන ලද්දක්දැයි දේශකයා අනතුරුව වැඩමුළුවේ සාමාජිකයන්ගෙන් විමසුවේය. 

එකිනෙකා පිළිතුර එකිනෙක ලබාදුන්හ. ලොවේ පිළිගත් මෙන්ම ප්‍රසිද්ධ පුද්ගලයන් රැසකගේ නම් මේ පිරිසකගේ මුවින් පිටවිය. එක් සාමාජිකයකු පැවසුවේ මේ ප්‍රකාශය තෝමස් අල්වා එඩිසන්ගේ බවය. මේ ආකාරයෙන් විවිධ නාම ප්‍රකාශ විණි. 

සියලු දෙනාගේ අදහස් විමසූ දේශකයා ඊළඟට තිරයේ නාමයක් ප්‍රදර්ශනය කළේය. එහි සඳහන්වූයේ අදාළ වැඩමුළුව පවත්වන ආයතනයේ ප්‍රධානියා වන ශ්‍රී ලාංකිකයාගේ නාමයයි. මෙය දුටු සේවක පිරිස වික්ෂිප්ත වූහ. මේ දේශකයා ඉදිරිපත් කළ ප්‍රකාශය තම ආයතන ප්‍රධානියාගේ කියමනක් බව දැනගත් සාමාජික පිරිස මහත් ලැජ්ජාවට පත්ව සිටියදී එය නොසලකා දේශකයා තම කාර්යය ඉදිරියට කරගෙන ගියත් ආයතනයේ සේවක පිරිසකගේ දැනීම ගැන වාර්තාවක් ඉදිරිපත් කරන්නට කටයුතු කළ බව පසුව දැනගන්නට ලැබිණි.