දුෂ්කර ගම්මානයක වයස්ගත පුද්ගලයෙක් නිවසේදීම මිය ගියේය. නිවසේ හිමිකරුවෝ වහාම ප්‍රදේශයේ මල් ශාලාවක් වෙත ගොස් තම ඥාතියාගේ මළ සිරුර එම්බාම්කර අවශ්‍ය කටයුතු කරදෙන ලෙසට ඉල්ලා සිටියහ.

මල් ශාලාවේ සේවකයින් ප්‍රකාශ කළේ සිරුර මල්ශාලාවට රැගෙනවිත් එම්බාම් කිරීම් කටයුතු සිදුකළ යුතු බවයි. 

ඒ අනුව මල් ශාලාවේ වාහනයකින් සිරුර රැගෙනවිත් අවශ්‍ය කටයුතු සිදු කෙරිණි.

මල් ශාලාවේ සේවකයන් මියගිය පුද්ගලයා පැළඳ සිටි බඳපටිය ඔහු භාවිතා කළ කොට්ටය ඇතුළු අනෙකුත් දේද රැගෙනවිත් තිබිණි.

සිරුර කල්තබා ගැනීමට බෙහෙත් ගැල්වීමේ කටයුතු අවසන්වීමෙන් අනතුරුව ඥාතීන් මියගිය පුද්ගලයාගේ බඳ පටිය හා කොට්ටය පිළිබඳව සොයා බලා තිබේ. ඒ ඔහු පැළඳ සිටි බඳපටියේ පොකැට්ටුවක රුපියල් 15,000කට ආසන්න මුදලක් තිබුණු බවට ඔවුන් දැන සිටි නිසාය. ඊට අමතරව කොට්ටය ඇතුළේද තම දරුවන් මියගිය අය වරින් වර ලබාදුන් මුදල් සඟවා තිබිණි.

මල් ශාලාවල සේවය කරන සේවකයින් මියගිය පුද්ගලයින්ගේ මුදල් හා වටිනා දේ මෙවැනි ස්ථානවල තිබෙන බව දන්නා බැවින් දේහය සමඟ ඒ සියලු දේ රැගෙන ගොස් අවශ්‍ය දේ ගෙන අනෙක් ඒවා විසිකර දමති.

මේ පිළිබඳව දැනගත් ඥාතිහු අදාළ මල්ශාලා මේ හිමිකරුගෙන් මේ පිළිබඳව විමසා සිටියහ. මල්ශාලා හිමිකරු මේ කිසිවක් දැන සිටියේ නැත. වහාම සේවකයින් ගෙන්වා බඳපටිය සහ කොට්ටය පිළිබඳව විමසූවිට සේවකයින් බඳ පටිය ආපසු ලබා දුන්නද එහි පොකැට්ටුවේ තිබුණු මුදල් නම් තිබුණේ නැත. මල්ශාලා හිමිකරු සේවකයින්ට තරයේ අවවාද කරනු දක්නට ලැබිණි.

(බලංගොඩ විශේෂ වයි. ඒ. වයි. වීරවංශ)