(පානදුර සමන්ත කාරියවසම්) සිය ඥාතීන්ට සහ මිතුරු මිතුරියන්ට එවන මංගල ආරාධනා පත්‍ර බෙදා මංගල උත්සවයට සූදානම් වෙමින් සිටි උපාධිධාරි තරුණියක් මංගල්‍යයට පෙර දින රාත්‍රියේ මේ මඟුලට මම අකමැතියි” කියා සිය පියාගේ ජංගම දුරකතනයට එස්.එම්.එස්. පණිවුඩයක් යවා පැදුරටත් නොකියා වෙනත් තරුණයෙකු සමග පැන යාමේ සිද්ධියක් බස්නාහිර පළාතේ නගරයකින් වාර්තා විය.

වාර්තා වන අන්දමට සිද්ධිය මෙසේය. විවාහ වීමට සිටි තරුණිය උපාධිධාරිනියකි. සිහින් සිරුරක් ඇති ඇය උසින් අඩි හයක් පමණ වන ප්‍රියමනාප තරුණියකි. ඇය සහ විවාහ වීමට සිටි තරුණයා ටෙලි නාට්‍ය නිෂ්පාදන ආයතනයක රැකියාවේ යෙදී සිටි අයෙකි. දෙදෙනා අතර ඇති වූ ප්‍රේම සබඳතාවට දෙපාර්ශවයේ මවුපියන්ගේ ද ආශිර්වාදය ද හිමිවූ අතර ඒ අනුව චාරිත්‍ර වාරිත්‍ර අනුව උත්සවය ගැනීමට දෙපාර්ශවයම එකඟ විය.

විවාහ උත්සවයට දින උදාවෙමින් පැවතිනි. මනාලයා ද මනාලිය ද සිය නෑ හිතවතුන්ට මංගල ආරධනා පත්‍ර බෙදා දෙමින් ලහිලහියේ විවාහ උත්සවය සංවිධානය කළහ. දෙපාර්ශවය මෙසේ සංවිධාන කටයුතුවල යෙදී සිටිද්දී රාත්‍රිය ද උදා වෙමින් තිබිණි. දියණිය පිළිබඳව කිසිදු හැලහොල්මනක් නොමැති වීම හේතුවෙන් ඇය පිළිබඳව සොයා බලන්නට පියා යුහුසුළු වෙද්දී ඇය නිවසේ නොමැති බව ඔහුට වැටහිණි. පැය කිහිපයක් ගත වුණි.

පියාගේ ජංගම දුරකතනයට කෙටි පණිවුඩයක් ලැබිණි. ඉන් කියවුණේ මේ විවාහයට තමන් කැමැති නැති බවය. පියාට සියලු දේ තේරුම් ගන්නට ගියේ සුළු මොහොතකි. මංගල උත්සවය වෙනුවෙන් ආරාධනා කළ දෙසීයකට ආසන්න පිරිසකට කියන්නේ කුමක්දැයි පියාට ගැටලුවක් විය. “අපට ප්‍රශ්නයක්, අද අක්කගේ වෙඩින් එක නැහැ” යයි නංගිලා ඥාතීන්ට දුරකතන පණිවුඩයකින් දැන්වූහ. ඇති වූ ලැජ්ජාව හේතුවෙන් නිවසේ දුරකතනය ද විසන්ධි කර දැමීය.