(හිඟුරානේ නවරත්න සමරතුංග) 
දකුණු ඉවුරේ පදිංචි වී සිටින නැන්දම්මා කෙනෙකුගේ දුක සැප බලන්නට වම් ඉවුරේ සිට පැමිණි බෑණා කෙනෙකු තම නෑනා ඉදිරියේ වස ලැජ්ජාවකට පත්වූ සිද්ධියක් අම්පාරේ ගොවි ගම්මානයකින් වාර්තා වේ. 

සිද්ධිය මෙසේය. 

ඔහු රෙදි බැනියම් ඇඳගෙන ගමන් බිමන් යන බාස් කෙනෙකි. කතාවෙන් හා ඉඳුම් හිටුම්වලින් ගම්‍ය වුණේ නූගත් බවකි. 

පසුගිය දිනක ඔහුගේ බිරියගේ මව සුළු අසනීපයකින් පසුවූ බව කියති. 

ළමා ළපටින්ද රැගෙන දුර ඈත යාමට අසීරුවූ බැවින් ඔහුගේ බිරිඳ තම සැමියා පමණක් එහි යවා මවගේ සැපදුක් බලාගෙන එන්නට පිටත් කර හැරීමට තීරණය කළාය. 

ඒ අනුව ගෙවත්තේ වැටුන කෙසෙල් කැනෙන් ඇවරියක්ද කපා ගමන් මල්ලට දැමූ බිරිඳ ඔහු නිවසෙන් පිට වන විට ‘අපේ අම්මාට විස්කෝතු පෙට්ටියකුත් අරන් යන්නැයි’ කීවාය. 

‘හා හොඳයි!’ කී ඔහු නගරය වෙත පැමිණ එක්තරා වෙළෙඳසලකට ගොඩවැදී බලනවිට එහි ගොඩගසා තිබුණ කිසියම් විස්කෝතු පෙට්ටි තොගයක් දැක ඒවායේ මිල විමසා එතැන සිටි සේවිකාවට මේක හොඳට පාර්සල් කර දෙන්නැයි පවසා ඇත. 

ඉන්පසුව බිල ගෙවූ ඔහු එයද ගමන් මල්ලේ දාගෙන නැන්දම්මා බලන්නට එම නිවසට ගොස් ඇත. 

ඔහු එහි යන විට බිරිඳගේ නැගනියක හෙවත් නෑනා කෙනකුද එහි සිටියාය. තෑගිබෝග මල්ල ඇය වෙත දිගුකළ ඔහු මේක නැන්දම්ට දෙන්නැයි කිවේය. 

ඉන් අනතුරුව තොරතුරු කතාකරමින් සාලයට වී සිටි බවද කියති. 

මේ අතර බෑණන්ඩිය ගෙනා පාර්සලය පරීක්ෂා කළ නැන්දම්මා පුදුමයට පත්ව බෑණාගේ මෝඩකම කියන්නට දියණිය කාමරයට කැඳවා එය ඇයට පෙන්වූවාය. 

කටකාර තරුණියක වූ නෑනා ඔහු ගෙතුළට කැඳවද්දී නැන්දම්මා ලැජ්ජාවට පත්ව ඉවතට ගියවිට ඇය ඔහුට මෙසේ කී බව පැවසේ. 

‘මොක්කද අනේ මේ? අම්මට තිබුණේ ඔයා හිතන ජාතියේ අසනීපයක් නෙවෙයි! උන්දැට තිබුණේ කොන්දේ අමාරුව’කැයි කියද්දී කරුණු තේරුම් නොගත් ඔහු ‘ඉතින්!’ යැයි කීය. 

‘ඉතින් කිතුල්’ මේ පාර්සලේ තියෙන දේවල් පාවිච්චි කරන්නේ අසවළුන් ’යැයි ඇය ලුණු ඇඹුල් හරිමින් ඔහුගේ කනට කර රහසින් යමක් කීවෙන් කරුණ තේරුම්ගත් ඔහු ‘දෙයියෝ සාක්කි මම හිතුවේ ඕක විස්කෝතු ජාතියක් කියලනේ’ කියමින් සනීපාරක්ෂක තුවා පෙට්ටිය නැවත අකුලාගෙන ගමන් මල්ලේ ඔබා ගත් බව කියති.