(නිකවැරටිය ප්‍රියාණි මංගලිකා)
පොලිස් නිලධාරීන් එනු දැක යතුරු පැදිය ද පසෙක දමා වතුරට පැන්න පුද්ගලයකු හඹාගිය අවස්ථාවේ නිලධාරීන් මුහුණ දුන් අපූරු පුවතක් කුරුණෑගල දිස්ත්‍රික්කයේ එක්තරා පෙදෙසකින් වාර්තා විය.

සිද්ධිය මෙසේය:-

පොලිස් නිලධාරීන් කීප දෙනකු රාජකාරී කටයුත්තක් සඳහා යමින් සිටියදී දුර සිටි අයකු යතුරුපැදියද මග දමා අසල තිබූ වැවට පනින අයුරු නිලධාරීන්ගේ නෙත ගැටුණි.

වහා ක්‍රියාත්මක වූ පොලිස් නිලධාරීන්, පොලීසිය මග හැරීමට ජලයට පැන්න පුද්ගලයා හඹාගියේ ඔහු අල්ලා ගන්නා අටියෙනි. එහෙත් ඒ ආසන්නයට යද්දී බඹර කූඩුවක් ඇවිස්සී ඇති බව ඔවුනට දැකගත හැකි විය. 

නිලධාරීන්ටද බඹරුන් එකා දෙන්නා අනින්නට විය. එහෙත් බඹරුන් වටකර ගැනීම හේතුවෙන් ජලයට පැන සිටින පුද්ගලයා ගලවා ගැනීම ඔවුන්ගේ ඉලක්කය විය.

වහා ක්‍රියාත්මක වූ ඔවුන් ජලයේ සිටින පුද්ගලයා කරා මහත් අපහසුවෙන් ළඟා වූ විට, ඔහුද පොලිස් නිලධාරියකු බව හඳුනාගෙන ඇත. ඉතා ඉක්මනින් වාහනයක් ගෙන්වා ගත් ඔවුන් බඹරුන් රැසක් ඇනීමෙන් අනතුරට ලක්ව සිටි නිලධාරියා වහා රෝහල් ගතකර ඇත.