(හක්මණ විශේෂ දෙනගම යසන්ත ආරියසේන)

පාදයේ අසනීපයකට ප්‍රතිකාර කිරීමට පැමිණි කට්ටඩියකු කාන්තාවක රවටා රන් මාලයක් සහ මුද්දක් ඉකුත්දා (3) සොරකම් කර ඇතැයි හක්මණ පොලිසිය කියයි.

හක්මණ ඇල්පොල කෝන් කැටියේ නිවසකට පුද්ගලයකු පැමිණි ගෙහිමි කාන්තාවට දානයකට යාමට ආරාධනා කර තිබේ. තමන් දණ හිස් අමාරුවෙන් පෙළෙන බව පවසා කාන්තාව එම ආරාධනාව ප්‍රතික්ෂේප කර ඇත. දණ හිසේ අමාරුව සුවකළ හැකි යැයි සැකකරු පවසා ඒ සඳහා සීනි හා ලුණු ස්වල්පයක්ද බුලත් කොළ කිහිපයක්ද ලබාදෙන ලෙස ගෙහිමි කාන්තාවට පවසා තිබේ. එම ද්‍රව්‍ය ලබාදීමෙන් අනතුරුව සැකකරු මන්ත්‍ර ජප කරමින් ස්වල්ප වේලාවක් ගතකර රන් හෝ රිදී වලින් තැනූ ආභරණයක් ලබාදෙන ලෙස ද එම අවස්ථාවේදී කාන්තාවට පවසා තිබේ.

එම අවස්ථාවේදී කාන්තාව ගෙල බැඳි රන් මාලය හා ඇඟිල්ලේ තිබූ මුද්ද ගලවා සැකකරුට ලබාදී ඇති අතර සැකකරු ඒවාද ලබා නැවතත් මන්ත්‍ර ජප කොට බුලත් කොළය ගුළියක් සේ සකසා නිවස වහලෙහි රඳවා තිබේ.

සැකකරු නිවසින් පිටව ගොස් විනාඞ් තිහකින් පසු වහලේ රඳවා ඇති බුලත් කොළ ටික ගෙන බලන ලෙස කාන්තාවට උපදෙස් ලබාදීමට ද සැකකරු අමතක නොකළේය. සැකකරුගේ උපදෙස් අනුව වහලේ තිබූ බුලත් කොළ ගෙන බලන විට එහි රන්මාලය හා මුද්ද නොතිබූ බව කාන්තාව කළ පැමිණිල්ලේ සඳහන් වන බව පොලිසිය පවසයි. හක්මණ පොලිස් ස්ථානාධිපති පොලිස් පරීක්ෂක නලින් වීරවර්ධන මහතා ඇතුළු නිලධාරීහු පරීක්ෂණ සිදු කරති.