(කරන්දෙණිය එම්. සුසිල් ප්‍රියන්ත)
කොරෝනා ඇඳිරි නීතිය අස්සේ පොලිසිය ගොනාට අන්දවා සිය අවශ්‍යතාව ඉටුකර ගැනීමට ගිය තරුණයකුට සිදුවූ අපූරු සිද්ධියක් දකුණු ලකේ නගරයකින් අසන්නට ලැබිණ.


පොඩි පොඩි සිද්ධින්වලට ඉඳහිට පොලිසියට එන තරුණයෙකි. මුළු පොලිසියම ඔහු ගැන නොදනිතත් ටික දෙනෙක් ඔහුගේ අලකලංචි පිළිබඳව දැන සිටියහ.


කොරෝනා ඇඳිරි නීතිය නිසා ඔහුට යාමට අවශ්‍ය ස්ථානය තිබුණේ පොලිස් මාර්ග බාධකයක් හරහාය. ඔහු ඒ සඳහා අපුරු උප්පරවැට්ටියක් භාවිත කළේය.


නගරයේ විහාරස්ථානයක ලේ දන්දීමේ වැඩසටහනක් පැවැතියේ ඔහු යාමට අපේක්ෂිත ස්ථානයට මෙහාය. කොහොමින් හෝ ඔහු එම ලේ දන්දීමේ වැඩසටහන පිළිබඳව අත් පත්‍රිකාවක් සොයා ගත්තේය. එය අතට ගත් ඔහු දැඩිසේ ප්‍රීතියට පත්විය. ඒ තමාගේ අවශ්‍යතාව එයින් ඉටුකර ගැනීමට හැකිවෙතැයි සිතූ බැවිනි.


මුහුණු ආවරණයක් හා තොප්පියක් දමා ලේ දන්දිමේ අත්පත්‍රිකාව ද ගෙන ඔහු නගරයේ පොලිස් මුර පොළ හරහා යාමට ගියේ කිසිදු බියකින් සැකයකින් තොරවය. පොලිස් මුර පොළේ නිලධාරිහු ඔහු නැවැත් වූහ. කොරෝනා ඇඳිරි නීතිය අස්සේ මේ කොහේද යන්නේ යැයි පොලිස් නිලධාරීහු ඔහුගෙන් ඇසූහ. ආ සර් මේ කොරෝනා කාලේ නිසා ලේ බැංකුවල ලේ හිඟයක් තියෙනවා කියලා දැන ගත්තා අසවල් පන්සලේ තියෙන ලේ දන්දීමේ වැඩසටහනටයි මම යන්නේ, කියමින් අතෙහි වූ අත් පත්‍රිකාව ද ඔහු පොලිස් නිලධාරීන්ට පෙන්වීය. හා යන්න යන්න ගිහින් ලේ දීලා එන්නකෝ යයි ඔහුට කීවත් එහි සිටි නිලධාරීයෙක් ඔහු අඳුනා ගත්තේය. මේ යකානම් යන්නේ ලේ දන් දෙන්න නෙමේ. මෙයා කවදාවත් ලේ දන්දෙන කෙනෙක් නෙමෙයි. කෝකටත් ඔහු පස්සේ ගිහිල්ලා බලන්න ඕන කියලා ඔහු හඳුනාගත් නිලධාරියා කීවේය. පොලිස් නිලධාරියා වහාම ක්‍රියාත්මක විය. ඔහු හොර රහසේම තරුණයා පස්සෙන් ගියේය.

ඔහු ලේ දන්දෙන විහාරස්ථානය ද පසු කර යමින් සිටියේය. තමා ගේ අනුමානය හරි යයි පොලිස් නිලධාරියා සිතුවේය. ඒ අනුව වහාම ඔහු නතර කර ගත්තේය. හා තමුන් දැන් අපට කියලා ආවේ ලේ දන් දෙන්න යනවා කියලානේ. මේ කොහේද යන්නේ යයි පොලිස් නිලධාරියා ඔහුගෙන් ඇසුවිට දිව කට වේලී ගියේය. පැවැසීමට දෙයක්ද නොවිණි.


එනවා යන්න ලේ දන්දෙන තැනට යන්න යයි කියමින් පොලිස් නිලධාරියා ඔහු ලේ දන්දෙන තැනට යොමු කළේය. ඔහු ලේ දන් දෙන තෙක්ම පොලිස් නිලධාරියා රැඳි සිටියේ ඔහුගේ තරම දන්නා නිසාය. මේ වගේ බොරු කියා කොරෝනා ඇඳිරි නීතිය කඩ කරන අය රටට වැඩදායක ක්‍රියාවටවත් යොදවන්න ඕනෑ යයි කියමින් පොලිස් නිලධාරියා එතැනින් ගියේ මේ සිද්ධිය තමන් දන්නා හඳුනන කෙනකුට පවසමිනි.