විදේශ රැකියා නියෝජිතායතන සහ ශ්‍රී ලංකා විදේශ සේවා නියුක්ති කාර්යංශය පිළිබඳව ජනතාව තුළ පවතින විශ්වාසය බිඳ දැමීමේ අරමුණෙන් ක්‍රියාත්මක වන සැලසුම්සහගත කුමන්ත්‍රණයක් හේතුවෙන් මෙරට විදේශ රැකියා ක්ෂේත්‍රය බරපතළ ලෙස කඩා වැටී ඇති බව බලපත්‍රලාභී විදේශ රැකියා නියෝජිතායතන සංගමය සඳහන් කළේය. 

මාධ්‍ය වෙත අදහස් දක්වමින් එම සංගමයේ ලේකම් මොහමඞ් ෆාරුක් මොහමඩ් අර්ශාඩ් පැවැසුවේ පසුගිය වසරවලට සාපේක්ෂව මේ වන විට රැකියා සඳහා විදේශගත වන ශ්‍රී ලාංකිකයන් සංඛ්‍යාව සියයට 20කට ආසන්න අගයකින් පහළ ගොස් ඇති බවයි. මෙය රටේ විදේශ විනිමය ආදායමට බරපතළ බලපෑමක් ඇති කරනු ඇතැයි ඔහු පැවැසුවේය. 

“සමාජ ක්‍රියාකාරීන් යැයි කියා ගන්නා පිරිසක් විදේශ රැකියා ක්ෂේත්‍රය බිඳ දැමීමට කටයුතු කරමින් ඉන්නවා. ඔවුන්ගෙන් සමහරුන්ට විවිධ බාහිර පාර්ශ්වවලින් විශාල වශයෙන් මුදල් ලැබෙන බවට තොරතුරු තිබෙනවා. රැකියාවක් සඳහා විදේශගත වීම පිළිබඳව ජනතාව තුළ ඇති විශ්වාසය බිඳ දැමීම සඳහා ඔවුන් ගෙන යන වැඩපිළිවෙළ කුමන්ත්‍රණයක් බව ඉතාමත් පැහැදිලියි.” ඔහු පැවසීය. 

යම් මූල්‍ය අක්‍රමිකතාවක් හෝ වෙනත් වරදක් සිදු කර ඇති ඕනෑම විදේශ රැකියා නියෝජිතායතනයකට, පුද්ගලයකුට, නිලධාරියකුට එරෙහිව අදාළ ක්‍රියා මාර්ග ගැනීම සඳහා තම සංගමය පූර්ණ සහයෝගය දෙන බවත්, එහිදී අවශ්‍ය පියවර ගැනීම සඳහා පිළිගත් සහ විධිමත් යාන්ත්‍රණයක් තිබෙන බවත් ඔහු පැවැසීය. 

“වසරකට 300,000කට ආසන්න පිරිසක් විදේශ රැකියා සඳහා යොමු වෙනවා. ඔවුන් වාර්ෂිකව ඩොලර් බිලියන 7කට ආසන්න මුදලක් රටට එවනවා. මේ ක්ෂේත්‍රය බිඳ වැටුණොත් ජනතාවට නැවතත් විදුලි බලය නැතිව පෝලිම්වල ඉන්න සිදු වේවි.”