මහමෙව්නාව අසපු සංචිතයේ නිර්මාතෘ කිරිබත්ගොඩ ඤාණානන්ද හිමියන්ගේ අනුශාසනා පරිදි 2009 දී ලන්ඩන් නුවර මහමෙව්නා ජාත්‍යන්තර භාවනා මධ්‍යස්ථානය ආරම්භ විය.

ශ්‍රී ලාංකික මෙන්ම අන් ජාතික බෞද්ධයන්ගේ ආකර්ෂණය දිනාගැනීමට සමත්වූ එම අසපුව නිර්මල බුදු දහම ව්‍යාප්ත කිරීම උදෙසා අමිල සේවාවක් ඉටු කරයි.

ලන්ඩන් මහමෙවුනා භාවනා මධ්‍යස්ථානය පිහිටුවා ඇත්තේ ජනාකීර්ණ නගරයෙන් දුරස්තරවූ නිස්කලංක රමණීය බැසිල්ඩන් ගමේය. එහි අක්කර හතරක වැනි විශාල භූමියක පිහිටි අසපුව නිතිපතා බුදුදහම පිලිබඳ දැනුම ලබාගැනීම සඳහාත් වන්දනා මාන කිරීම සඳහාත් පැමිණෙන ලොකු කුඩා සැදැහැවතුන්ගෙන් පිරි පවතී.

බුදුදහමේ ගැඹුරු තැන් පිළිබඳව පැවැත්වෙන ධර්මදේශනා, ධර්ම සාකච්ඡා සහ දහම් පාසල් අධ්‍යාපනය සඳහා මුල්තැනක් දෙමින් සකසා ඇති වැඩසටහනට දාන සීල භාවනා මෙන්ම බුද්ධ වන්දනා, බුද්ධ පුජා, ධාතු වන්දනා, බෝධි වන්දනා සහ සංඝ උපස්ථාන වැනි ආමිස පුජාමය පින්කම්ද ඇතුළත්වෙයි. ඒ තුළින් අසපුව වෙත ඇදී එන සැදැහැවතුන් හට නිර්මල බුදුදහමේ උතුම් ගුණය වටහාගෙන ඒ මඟින් තම ජිවිත සඳහා අගනා එළියක් ලබාගැනීම සඳහාද අවස්ථාව උදාකර දෙනු ලබයි.

දැනට බැසිල්ඩන් අසපු භුමියේ අලංකාර එළිමහන් බුදුමැදුරක්, සුවිශේශිතවූ චෛත්‍යයක් සහ සංඝයා වහන්සේලාගේ නවාතැන් පහසුව සඳහා කුටි කිහිපයක් ඉදිකර ඇත.

මෙවර වෙසක් පුන් පොහොය දවසේ අභිනව එළිමහන් බුදු මැදුරෙහි ශ්‍රී ලංකාවේ සිට වැඩමකරවන ලද බුදුපිළිම වහන්සේ තැන්පත් කෙරෙනු ඇත.

ලන්ඩන් අසපුව මඟින් මාස් පතා ලන්ඩන් නුවර අවට හවුන්ස්ලෝ. වොට්ඵර්ඩ් සහ නිව් මොල්ඩන් යන පලාත්වලදීද දහම් වැඩසටහන් සහ ළමුන් සඳහා විශේෂිතවූ වැඩසටහන් ක්‍රියාත්මක කෙරෙයි.

මෙම පින්කම් සඳහා සහභාගිවන සැදැහැවතුන්ගේ සංඛ්‍යාව දිනපතා වැඩිවෙමින් පවතින බැවින් උතුරු ලන්ඩනයේ ස්ටන්මෝර්, බටහිර ලන්ඩනයේ අක්ස්බ්‍රිජ් සහ සරේ යන ප්‍රදේශවල අභිනවයෙන් මහමෙව්නා අසපු තුනක් ආරම්භ කිරීම සඳහා දැනට කටයුතු සුදානම් කර ඇත.

Mahamevnaaw-5 Mahamevnaawa3 Mahamevnaawa-6 MAHAMEWNAAWA-MONK-2 MAHAMEWNAWA MAHAMEWNAWA2 MAHAMEWNAWA-3 MAHAMEWNAWA-8