ඇමෙරිකා ජනාධිපති සහ ජනපති බිරිය ප්‍රසිද්ධියේ පෙනී සිටින්නේ ශාන්ත දාන්ත කිසි කලබලයක් නැති ශුද්ධවන්ත චරිත ලෙසටයි. ධවල මන්දිරයේ පෞද්ගලික නිවාසයේ දොරටුවෙන් පිටතට ඔවුන් හැසිරිය යුත්තේ අතිඋත්තම මිනිසුන් ලෙසටය. 

ඔවුන් හට මේ හැසිරීම් රටාව පුරුදු පුහුණු කිරීමට ඒ පිළිබඳ සුවිශේෂි‘‘ දැනුම් සම්භාරයක් ඇති විශේෂඥ උපදේශකවරු කණ්ඩායමක් සිටිති. ඇමෙරිකා ජනාධිපති හෝ ඔහුගේ පවුලේ කිසිකෙනෙක්  කිසි දිනක කට කැඩිච්ච කතා කියන්නේ නැත. ඔරවන්නේ නැත. ගොරවන්නේ නැත. අඩුගණනේ මොන කරදර ප්‍රශ්න වලට මුහුණ පෑවත් මුණ ඔරොක් කරගන්නේවත් නැත.

එසේ වන්නේ ඔවුන් වෙනුවෙන් ගෙදර පවත්වාගෙන යන උපකාර පන්ති වලදී කියාදෙන ක්‍රියා පරිපාටිය ඔවුන් සියලුම දෙනා අකුරටම පිළිපදින නිසාය.

කෙසේ වුවද ඇමෙරිකා ජනාධිපති බරක් ඔබාමා ගැන වැඩ් දෙනකුගේ සිතේ ඇත්තේ  මහපොළොවේ ජීවත්වන නිරහංකාර මිනිසකු ලෙසය. ජනතාව ඉදිරියේ ඔහු සිනාමුසු මුහුණක් පෙන්වන්නේත්, පාරේ ඇවිද යනවිට සාමාන්‍ය මිනිසුන් සමඟ අල්ලාප සල්ලාපයෙහි යෙදෙන්නෙත්, කඩ පිලකට ගොඩවී තේ වතුර උගුරක් බොන්නේත් මුණ ඉච්චාවට නොව අවංක චේතනාවෙන් බව ඇමෙරිකානුවෝ බොහෝදෙනා විශ්වාස කරති. ඒ ඔබාමාගේ හැටිය.එයා එහෙම වුනාට එයාගේ ගෙදර හැමෝටම ඒ ගතිගුණ පිහිටා නැත.

ඔවුන් උපකාර පන්තිවල කියාදෙන දේ පිළිපදින්නට කොච්චර උත්සාහ කළත් සමහර අවස්ථාවල උපෙදස් අමතක වන අවස්ථා නැතුවාම නොවේ .

එවැනි සිදුවීමක් ජාත්‍යන්තර මාධ්‍ය ඔස්සේ ප්‍රචාරය විය. 

ඇමෙරිකා ජනාධිපති ඔබාමාගේ බිරිය මිෂෙල් ඔබාමා වොෂින්ටන් නුවරදී පක්ෂ ප්‍රචාරක රැස්වීමක ප්‍රධාන ආරාධිතයා විය. දේශනය අතරතුර කාන්තාවක් ඊට අවහිර කරමින් කෑකෝ ගැසුවාය. සමලිංගික සම්බන්ධතා වල වරදක් තැති බව ඈ කීවාය.

මිෂෙල් ඔබාමාගේ රතු කට්ට පැන්නේ මේ වෙලාවේදීය.ගෙදර උපකාර පන්තිවල දී උගත් සංයමය ඇයට අමතකවිය.කතාව නවතා දැමු ඔබාමා මැතිණිය තම දේශනයට අවහිර කළ කාන්තාව වෙත කෙලින්ම ගියාය. 

"මොකද කියන්නේ මගේ කතාව නවත්වල ඔහෙට මයික්‍රෆෝනය දෙන්නද" මිෂෙල් ඔබාමා එම කාන්තාවගෙන් ඇසුවාය. මිෂෙල් ඔබාමාගේ කාල වර්ණ මුහුණ රතු පැහැ ගැන්වී තිබුණි. ඇයට "යකා නැග" තිබුන එහි සිටි සියල්ලෝම කීහ. එහි සියල්ලෝම කට ඇරගෙන බලා සිටියහ.

නැවත වතාවක් සෙනග දෙසට හැරුන මිෂෙල් ඔබාමා " ඔය ගොල්ලෝ මොකද කියන්නේ. මගේ කතාව නවත්වල මෙයාට කතා කරන්න කියන්නද?" කියා විමසා සිටියාය.

ශාලාව පිරී ඉතිරී සිටි සෙනඟ කන් බිහිරිවන හඬින් " අපොයි එපා අපි අවේ මිෂෙල් ගේ කතාව අහන්නයි" කියා බෙරිහන් දුන්නාහ.

මිෂෙල් ඔබාමාගේ ආරක්ෂකයෝ  විරෝධය ප්‍රකාශ කළ  කාන්තාව කඩිනමින් කුදලාගෙන ශාලාවෙන් පිටමං කළහ.

තම දේශනය නැවත ආරම්භකළ මිෂෙල් ඔබාමා කීවේ " මගේ මහත්තයා ලෝකයේ බලවත්ම කෙනා වෙන්න පුළුවන්. ඒත් අපි සේරම සාමාන්‍ය මිනිස්සු තමා" කියාය.

සියල්ලෝම නැවතත් ඔල්වරසන් දුන්හ. බරක් ඔබාමාගේ ජනප්‍රියතාවයට තවත් ලකුණු ගණනක්ම එදා එකතුවූ බව පුවත් පත් වාර්තා වල සඳහන් විය.