තම මෝටර් රථයත් සංසාර ගමනට එක්කර ගැනීමට සැරසෙන්නෙකි, බ්‍රසීල ජාතික ව්‍යාපාරික කවුන්ට් ස්කාර්පා.

අතීතයේ ඊජිප්තුව පාලනය කළ පාරාවෝවරුන් මරණින් මතු ජීවිතයේදීත් සැප ලැබීමට තම තමන්ගේ වස්තූ ‘මිහිදන්‘ කළාක් මෙන් කවුන්ට් ස්කාර්පාද සැරසෙන්නේ තම මරණින් මතු භවයේදී ‘පැදවීමට‘ හැකි වන සේ තම වටිනා මෝටර් රථයටත් මිනී වළක් උරුම කර දීමටයි.

ඛෙන්ට්ලි නම් සුපිරි මෝටර් රථ වර්ගයට අයත්   මෙම මෝටර් රථයේ වටිනාකම පවුම් තුන් ලක්ෂයකි.

මෙවන් අදහසක් පහළ වූයේ ඇයිදැයි විමසූ කල්හි ස්කාර්පා පිළිතුරු දී ඇත්තේ තමන් මෑතකදී නැරඹූ පාරාවෝවර්න් පිළිබඳ  වාර්තාමය වැඩසටහනක් ඊට හේතු වූ බවයි.

‘මගේ වස්තුව ඛෙදා දෙන්න කිසි කෙනෙක් නැහැ.ඉතින් මේ විදිය හොඳයි කියලා මට හිතුනා. මගේ දේ මම යනවත් එක්කම අරගෙන යන එකයි හොඳයි‘ යැයි ඔහු පවසයි.

පරම්පරාවෙන් උරුම වුණු ධනයත් ස්වෝත්සාහයෙන් ගොඩනැඟූ වෙළද ව්‍යාපාරත් අයත් ස්කාර්පා ප්‍රාකෝටිපතියෙකි.අතට පයට ඔහුට කිසිත් අඩුවක් නැත.නමුත් දෙවරක් විවාහ වී සිටින ඔහුට වස්තුව ඛෙදා දීමට දරුවෙක් හෝ ළග ඥාතියෙක් හෝ නැත.ධනයෙන් ආඪ්‍ය වූවත් ස්කාර්පාගේ තනි රැකීමට සිටින්නේ ඔහුගේ සුරතල් ගිරවා පමණකි.