මිනිසා කුසගින්නේ සිටින විටදී වඩා නිවැරදි තීන්දු තීරණ ගන්නා බව නෙදර්ලන්ත පර්යයේෂකයෝ පිරිසක් කියති.

මින් පෙර ඉදිරිපත්ව තිබූ මතය වූයේ හොදින් අහර ගෙන කුසගිනි නිවාගන්නා පුද්ගලයෝ නිවැරදි තීරණ ගන්නා බවයි.

නමුත් පර්යේෂක පිරිස සිදුකර තිඛෙන සරල පර්යේෂණයකින් බඩගිනිකාරයෝ වඩා නිවැරදි තීරණ ගැනීමට පෙළඹෙන බව අනාවරණයව තිබේ.

පර්යේෂණයට විශ්වවිද්‍යාල සිසුන් පිරිසක් යොදාගෙන ඇති ඔවුන් මුලින්ම එම සිසුනට මුලූ රැයක් නිරාහාරව සිටින්නැයි උපදෙස් දී ඇත.

පසු දිනයේදී සිසුන් පර්යේෂණය සදහා විද්‍යාගාරය වෙත පැමිණි විට ඔවුන් කණ්ඩායම් දෙකකට බෙදා ඇති පර්යේෂකයෝ එක් කණ්ඩායමකට ආහාර ගැනීමට ඉඩ සලස්වාදී අනෙක් කණ්ඩායම දිගටම නිරාහාරව තබා තිබේ.

අනතුරුව සිසුන් කණ්ඩායම් 2 ක වෙන් වෙන් වශයෙන් ප්‍රශ්නාවලි, බුද්ධිය මැන බැලීමේ ක්‍රියාකාරකම් ආදියට භාජනය කිරීමට පර්යේෂකයෝ කටයුතු කර ඇත.

එහිදී හෙළිව තිඛෙන්නේ කුසගින්නේ සිටින කණ්ඩායම කුස පුරවාගත් කණ්ඩායමට වඩා බුද්ධිය මෙහෙයවා තීරණ ගන්නා බවයි.

උදාහරණයක් ලෙස දැන් දෙන කුඩා මුදල් ප්‍රමාණයකුත්, අනාගතයේ දෙන විශාල මුදල් ප්‍රමාණයකුත් අතරින් කුමක් තෝරා ගන්නේදැයි කණ්ඩායම් දෙකෙන් පර්යේෂකයින් විමසූ කළ බඩගිනිකාර කණ්ඩායම අනාගතයේ දෙන මුදල් ප්‍රමාණය ලබාගැනීමටත් බඩපුරවාගත් කණ්ඩායම දැන් දෙන මුදල් ප්‍රමාණය ලබාගැනීමටත් කැමැත්ත පළ කර තිබේ.

කුසගින්නේ සිටි කණ්ඩායම අනාගතය ගැන සිතා තීරණ ගන්නා බවක් පැහැදිලිව පෙනුනු බව පර්යේෂකයෝ කියති.

අද සමාජයේ පැතිර පවතින මොනවා කරන්නත් හොදින් කාබී සිටිය යුතුය යන මතය සෑම විටම සැබෑ නොවන බව මෙම පර්යේෂණයෙන් පෙනෙන බව ඔවුහු පවසති.

කුසගින්නේ සිටින විට මානසික පීඩාවක් ඇතිවන බව සැබෑ වුවත් මේ පර්යේණයේ ප්‍රතිඵල අනුව එය සෑම විටම අයහපත් දෙයක් ලෙස සැළකිය නොහැකි බව ඔවුන්ගේ අදහසයි.