තුර්කිය රුසියා යානයකට තුර්කි – සිරියා දේශ සීමාවේදී ප්‍රහාර එල්ල කර බිම හෙළීම රුසියා ජනාධිපති ව්ලැද්මීර් පුටින් හෙළා දැක ඇතැයි විදෙස් පුවත් සේවා අනාවරණය කරයි.

ත්‍රස්තවාදයට සහාය පළ කරන අය පිටුපසින් සිට පිහියෙන් ඇනීමක් ලෙස මෙම ප්‍රහාරය සලකන බව පූටින් පවසයි. මේ සම්බන්ධයෙන් සාකච්ඡා කිරීමට නේටෝ සංවිධානය ද රැස්ව ඇති බව විදෙස් පුවත් සේවා කියයි.

රුසියා යුද ප්‍රහාරක යානයට අනතුරු අඟවා තිබියදී ත් එය තම ගුවන් සීමාව උල්ලංඝනය කළ බව තුර්කිය සඳහන් කරන අතර  රුසියාව කියනුයේ තම යානය කිසිවිටෙකත් තුර්කි ගුවන් සීමාව උල්ලංඝනය නොකළ බව යි.

නේටෝ සංවිධානයේ මහ ලේකම් ජේන්ස් ස්ටෝල්ටන්බර්ග් කියනුයේ රුසියා යානය තුර්කි ගුවන් සීමාව හරහා පියාසර කර ඇති බව පෙනී යන බව යි.

මේ ප්‍රහාරය සම්බන්ධයෙන් බරපතල ප්‍රතිවිපාක විඳීමට සිදුවනු ඇතැයි රුසියා ජනපති පූටින් තුර්කියට අනතුරු අඟවා ඇතැයි දැනගන්නට ඇත.

මේ අතර රුසියාවේ කිසිවකුට තුර්කියේ සංචාරය නොකරන ලෙසට ද එරට විදේශ අමාත්‍යංශය දැනුම් දී ඇතැයි රුසියාවේ ආරංචි පවසයි.