වසර 11 පුරාවට තම හිසෙන් ගැලවී වැටුණු කොණ්ඩ ගස් එකතු කර ඒවායින් කබායක් හා හිස්වැස්මක් මසා තම සැමියාට තෑගි කළ කාන්තාවක පිළිබඳව චීනයෙන් වාර්තා වේ.

ෂියෑන්ග් රෙන්සියෑන් නම් වන මේ කාන්තාව විශ්‍රාමික ගුරුවරියකි.ඇය දැනට 60 හැවිරිදි වියේ පසුවේ.

‘මට තරුණ කාලේ තිබුණා ලස්සන කොණ්ඩයක්.නමුත් වයසට යනකොට මගෙ රූපෙත් එක්කම කොණ්ඩෙත් වයසට යන්න පටන් ගත්තා.ගැලවී යන කොණ්ඩ ගස් ඉවත දමන්න මට හිත දුන්නේ නැහැ.ඉතින් මම ඒවා එකතු කළා.‘ ඇය කියන්නීය.

ඇය තම කොණ්ඩ ගස් එකතු කිරීමට පටන්ගෙන ඇත්තේ වයස අවුරුදු 34 සිටය.

එකතු කළ කොණ්ඩ ගස් වලට කුමක් කරන්නේදැයි ඇයට සැළසුමක් තිබී නැත.පසුව ඒවා යොදාගෙන තම සැමියාට කබායක් හා හිස්වැස්මක් මසා දෙන්නෙමියි ඇය ඉටාගෙන ඇත.

‘එක සැරේ කරන්න පුළුවන් වෙච්ච වැඩක් නොවේ.මොකද එක සැරේට කොණ්ඩ ගස් තොගයක් ගැලවිලා වැටෙන්නේ නැහැනේ.ඉතින් මම ගැලවි  වැටෙන හැටියට ඒවා එකතු කර ටික ටික තමයි කබායයි හිස්වැස්මයි මැහුවේ.මහලා ඉවර වෙද්දී අවුරුදු 11 ක් ගිහිල්ලා‘ ඇය පවසන්නීය.

කබාය හා හිස්වැස්ම මසා ඇති නූල් ‘හිස කෙස්‘ එකට අඹරා සාදාගත් ඒවාය. හිස කෙස් වලින් නූල් සාදාගැනීමට තමන්ට අපහසුවූවත් පසුව එම අභියෝගයත් ජයගත් බව ඇය කියන්නීය.

වසර 11 පුරාවට ගැලවී වැටුණු කොණ්ඩ ගස් ගණනද ඇය ගණන් කර ඇත්තීය.

‘මේ දෙක මහන්න මම කොණඩ ගස් 116058 ක් පාවිච්චි කර  තියෙනවා.මහලා ඉවර වුනාට පස්සේ කබාය ග්රෑම් 400 ක් විතර බර වුණා. තොප්පියේ බර වුණේ ග්රෑම් 120 ක් විතර‘ ඇය පවසන්නීය.