කැස්සට දෙන නොයෙකුත් පැණි වර්ග කැස්ස ඇතිවීමට හේතුවන රෝගය මර්දනය කිරීමට කිසිදු අයුරකින් උපකාරී වන්නේ නැතැයි බ්‍රිතාන්‍යය ජාතික සෞඛ්‍ය සේවයේ වෛද්‍ය පර්යේෂක කණ්ඩායමක් හෙළි කර තිබේ.

එවන් පැණියකින් සිදුවන්නේ උගුරට සහනයක් ලබාදීම, හුස්ම ගැනීමට අවහිරතාවක් තිබේනම් එය සමනය කර දීම වැනි සුළු දේවල් බවත් බොහෝ දෙනා සිතා සිටින පරිදි ඒවායින් කැස්සට සම්පූර්ණ සුවයක් ලැබෙන්නේ නැති බවත් ඔවුහු කියති.

මෙනිසා එවැනිදේට මුදල් වියදම් නොකර මීපැණි, දෙහි යුෂ ආදිය එකට මිශ්‍ර කර නිවසේදීම සාදාගත හැකි පැණියක් භාවිතා කිරීම වඩා සුදුසු යැයි ඔවුන්ගේ අදහසයි.

මේ සම්බන්ධයෙන් සිදුකර ඇති පර්යේෂණයෙන් කැස්සට දෙන පැණි වර්ග කැස්ස මර්දනය කිරීමට ක්‍රියාකාරී වන ආකාරයන්ද හඳුනාගෙන ඇත.

සමහර ඒවා උගුරට සහනය ගෙන දෙද්දී ඇතැම් ඒවා සම්පූර්ණ කැස්ස ඇතිවන යාන්ත්‍රණයම තාවකාලිකව අත්හිටවන බව පර්යේෂක පිරිස පවසති.

මේ සියල්ලෙන්ම කරන්නේ කැස්ස සුව වූවායැයි රෝගියා රැවටීම බව ඔවුහු කියති.

ඇතැම් පැණි වර්ග වල සීනි ප්‍රතිශතය ඉතා අධික යැයි හදුනාගැනීමට හැකිවූ බවත් මෙනිසා කැස්සක් ආ සැනෙන් නොයෙකුත් පැණි වර්ග බීමට පුරුදුව සිටින ඇතැමුන් තමන් මිලදී ගන්නේ කුමක්දැයි සැළකිලිමත්විය යුතු බවත් ඔවුහු අනතුරු අඟවති.

හොඳම දෙය කැස්සක් ආ සැනෙන් කැස්සට දෙන පැණි වර්ග සොයා දිවීම නොව නිවසේ සාදාගත හැකි පානයකින් එය සමනය කර ගත හැකිදැයි බැලීමත් නොඑසේනම් නිසි වෛද්‍ය උපදෙස් ලබා ගැනීමත් යැයි වෛද්‍ය පර්යේෂක පිරිස අවවාද කරති.

1413376318370_wps_7_image001_png