අල් කයිඩා නායක ඔසාමා බින් ලාඩින්ට මරු කැඳවූයේ තමා වුවත් අද දිනයේ අතමිට හිඟව රැකියාවකුදු නොමැතිව ඉතා අසරණව දිවි ගෙවීමට සිදුව ඇතිබව ඔසාමා බින් ලාඩින්ට මරු කැදවූ උණ්ඩය එල්ල කළ බව කියන ඇමරිකා නේවිසීල් හමුදා භටයා පුවත්පත් සාකච්ඡාවකදී පවසා තිබේ.

2011 වසරේ මේ මෙහෙයුම පිළිඹද අනාවරණවය ඇති තොරතුරු වලට අනුව පකිස්තානයේ සැඟව සිටි බින් ලාඩෙන්ව ජීවග්‍රහයෙන් අල්ලා ගැනීමට සැළසුම් කෙරී තිබුණද මෙහෙයුමට යැවුණු ඇමරිකා නේවිසීල් භට කණ්ඩායම අතර ඇතිවූ වෙඩි හුවමාරුවකින් ඔහු මරණයට පත්විය.

තම අනන්‍යතාව සගවා අදහස් දක්වා ඇති හමුදා භටයා බින් ලාඩන් තමන් සිතා සිටියාට වඩා උස් පුද්ගලයෙකුවූ බවත් තමන් ඇතුළු කණ්ඩායම ඔහුගේ නිවසට කඩා වදින විට ඔහු සිටියේ ඔහුගේ ලාබාල බිරිඳක් සමග බවත් පවසා ඇත.

ඒ මෙහෙයුමට හවුල්වීම නිසා තමන්ට බොහෝ දේ අහිමි වූ බව කියා ඇති හෙතෙම පවුලේ ආරක්ෂාව ගැනද වඩාත් සැලකිලිමත්වීමට සිදුව ඇති බවද සඳහන් කර ඇත.

මේ අතර මෙම සාකච්ඡාව සම්බන්ධයෙන් පෙන්ටගනය විශේෂ පරීක්ෂණයක් ආරම්භ කර තිබෙන අතර පෙන්ටගන ආරංචි මාර්ග පවසන්නේ සාකච්ඡාවේදී රහසිගත තොරතුරු හෙළිවී ඇත්දැයි සොයාබැලීමට මෙම පරීක්ෂණය සිදුකරන බවයි.

සාකච්ඡාවට සහභාගීවූ හමුදා භටයාගේ අනාගතය ගැන ප්‍රකාශයක් කිරීම පෙන්ටගනය ප්‍රතික්ෂේප කර ඇත.