මුස්ලිම් ලොව කලඹවමින් නබි නායකතුමාටත් ඉස්ලාම් දහමටත් නිගරු වන අන්දමේ චිත‍්‍රපටය නිර්මාණය කළ ඇමෙරිකානු ජාතිකයා මරා දමන අයකුට ඇමෙරිකන් ඩොලර් ලක්ෂයක මුදලක් පිරිනැමීමට තමන් සූදානම් යැයි පාකිස්තාන දුම්රිය කටයුතු පිළිබඳ ඇමැති ගුලාම් අහ්මඞ් පවසයි. ”ඉස්ලාම් දහමටත් නබි නායකතුමන්ටත් නිගරු කළ ඇමෙරිකානුවා මරා දමන්න  ඕනෑ. ඔහු මරා දමන  ඕනෑම අයකුට මුදල් ත්‍යාගයක් පිරිනමන්න මා සූදානම්. මා තලේබාන් සහ අල්කයිඩා මුස්ලිම් සොහොයුරන්ගෙන් ද එම ඉල්ලීම කරන්න කැමැතියි ” යැයි ඇමැතිවරයා කියා සිටියේ පෙරේදා (22) ඉස්ලාමාබාද් නුවර මාධ්‍ය හමුවක් පැවැත්වූ අවස්ථාවේදීය. ඇමැතිවරයාගේ එම ප‍්‍රකාශය රජයේ ස්ථාවරය නොවන බව පාකිස්තාන රජය විශේෂ නිවේදනයක් නිකුත් කරමින් කියා සිටී. නබි නායකතුමාටත් ඉස්ලාම් දහමටත් නිගරු වන අන්දමින් ‘ඉනසන්ස් ඔෆ් මුස්ලිම්ස්’ යන නමින් සිනමාපටයක් නිර්මාණය කළේ නකූලා බැසලේ නමැති 56 හැවිරිදි ඇමෙරිකානු ජාතිකයාය. ඔහු කැලිෆෝනියාවේ ලොස් ඇන්ජලීස් නුවර පදිංචිකරුවකු වන අතර ඊජිප්තු ජාතිකයකු වන ඔහු ඇමෙරිකාවට සංක‍්‍රමණය වී ඇත්තේ 1990 දශකයේදීය. නකූලාගේ චිත‍්‍රපටයට ඇමෙරිකාවේ     මුස්ලිම්වරුන්ගේත් එරට සුදු ජාතිකයන්ගේත් විරෝධය එල්ල වී ඇත. එම නිසා නකූලා සහ පවුලේ අයට ඇමෙරිකාව තුළින් ප‍්‍රහාරයක් එල්ල වේවි යැයි ඇමෙරිකා ආරක්ෂක අංශ බිය පළ අතර ඔවුන් ආරක්ෂිතව රහස් ස්ථානයනට ගෙන යෑමට ද ඇමෙරිකානු ආරක්ෂක අංශ පියවර ගෙන තිබේ. ‘ඉනසන්ස් ඔෆ් මුස්ලිම්ස්’ චිත‍්‍රපටය සම්බන්ධයෙන් ඇමෙරිකා ජනපති බැරැක් ඔබාමා විශේෂ ප‍්‍රකාශයක් කරමින් පවසා ඇත්තේ තමන් එය දැඩි ලෙස පිළිකුල් කරන බවත් තරයේ එය හෙළා දකින බවත්ය. ඉකුත් සිකුරාදා දින පාකිස්තානයේ ඉස්ලාමාබාද්, කරච්චි, ලාහෝර් සහ පෙෂවෝර් යන නගරවල ප‍්‍රචණ්ඩකාරී ඇමෙරිකානු විරෝධතා පැවැත්වුණු අතර කලහකාරීව හැසිරුණු පිරිස් කඩ සාප්පුවලට පහර දෙමින් වාහන ගිනිබත් කරන්නට වූහ. කලහකාරී එම පිරිස් මර්දනයට පොලිසිය යෙදවීමට පාකිස්තාන රජයට සිදුවූ අතර පොලිසිය සමඟ ඇතිවුණු ගැටුම්වලින් විරෝධතාකරුවෝ 19 දෙනෙක් ජීවිතක්ෂයට පත් වූහ. තුවාල ලබා රෝහල් ගත කළ පිරිස 200 කට වැඩි විය. මේ අතර ඉස්ලාමාබාද් නුවර ඇමෙරිකානු තානාපති කාර්යාලයට කඩා වැදීමට පන්සියයකට අධික විරෝධතාකරුවන් පිරිසක් උත්සහ කළ ද එය අසාර්ථක විය.