ළමා අයිතිවාසිකම් වෙනුවෙන් හඬ නැගූ 14 හැවිරිදි පාකිස්තාන ජාතික දැරියක තලේබාන් සටන්කාමීන් කළ වෙඩි තැබීමකින් පෙරේදා (9) බරපතළ තුවාල ලැබුවාය. වෛද්‍යවරු ප‍්‍රකාශ කළේ දැඩි සත්කාර ඒකකයේ ප‍්‍රතිකාර ලබමින් සිටින මලාලා යූසාෆ්සා නමැති එම දැරියගේ තත්ත්වය අවදානම් බවය. වෙඩි ප‍්‍රහාරය එල්ල වී ඇත්තේ ඇගේ හිසටය. පාකිස්තානයේ ස්වාත් නිම්නයේ දරු දැරියන්ට අධ්‍යාපනය ලැබීමට ඇති අයිතිය වෙනුවෙන් ඇය 2007 වසරේ සිට හඬක් නගා ඇති අතර එම නිසාම ඇය පාකිස්තාන ජනතාවගේ ද ආදරය දිනා ගැනීමට සමත් වූවාය. පසුගිය වසරේ පාකිස්තාන රජයේ සාම ත්‍යාගයෙන් ද ඇය පිදුම් ලැබුවාය. එම වසරේම ජාත්‍යන්තර ළමා සාම ත්‍යාගය වෙනුවෙන් ද ඇගේ නම යෝජනා විය. ස්වාත් නිම්නයේ දරු දැරියන්ට, විශේෂයෙන් දැරියන්ට අධ්‍යාපනය ලබා ගැනීම ෂරියා නීතිය යටතේ තලේබාන් සංවිධානය තහනම් කර තිබුණි. තලේබාන් සටන්කාමීන් ස්වාත් නිම්නයේ සිය අණසක පැතිරවූයේ 2007 වසරේ සිට 2009 තෙක් කාලයේය. 2009 වසරේ දී ඔවුන් පන්නා දැමීමට පාකිස්තාන රජයේ හමුදා සමත් විය. පාකිස්තාන ආරක්ෂක අංශ මැදිහත් වී තුවාල ලැබූ මලාලා යූසාෆ්සා ගුවන් මගින් පෙෂවෝර් නුවර සයිඩු ෂරීෆ් හමුදා රෝහලට රැුගෙන යෑමට කටයුතු කළේය. ඇය සමඟ සිටි ඇගේ යෙහෙළියන් දෙදෙනකුත් තලේබාන් තුවක්කුකරුවන් වෙඩි ප‍්‍රහාරයෙන් තුවාල ලැබූ බව වාර්තා විය. යූසාෆ්සාට එල්ල වූ ප‍්‍රහාරය ම්ලේච්ඡු සහ තිරිසන් කි‍්‍රයාවක් යැයි ඇමෙරිකා රජය පවසා ඇත. බටහිර රටවල් රැසක් ද තලේබාන් සටන්කාමීන්ගේ එම කුරිරු කි‍්‍රයාව හෙළා දැක ඇතැයි ද වාර්තා වේ.