ඇමරිකාවේ ඇරිසෝනා ප්‍රාන්තයේ මාර්ගයක ධාවනය කළ ඌබර් සමාගමට අයත් ස්වයං පාලක මෝටර් රථයක හැපී පාර හරහා ගමන් කළ 49 හැවිරිදි කාන්තාවක් මියගොස් ඇතැයි වාර්තා වේ. 
 
මෙම කාන්තාව පදික මාරුවක් නොතිබූ ස්ථානයකින් පාර හරහා ගමන් කිරීමට උත්සාහ කළ අවස්ථාවේ අනතුර සිදුවී ඇත.
 
ස්වයං පාලක මෝටර් රථ මගින් පසුගිය කාලයේ විවිධ ආකාරයේ අනතුරු සිදුවී ඇතත් මාරක රිය අනතුරක් සිදුවූ ප්‍රථම අවස්ථාව මෙය බව බලධාරීහු පවසති. 
 
මේ සම්බන්ධව නිවේදනයක් නිකුත් කරමින් ඌබර් සමාගම පවසා ඇත්තේ උතුරු ඇමරිකාවේ දැනට ක්‍රියාත්මක වන ස්වයං පාලක මෝටර් රථ අත්හදාබැලීම් වහාම ක්‍රියාත්මක වන පරිදි තහනම් කළ බවයි.
 
ඇමරිකාවේ ප්‍රාන්ත කිහිපයක ස්වයංපාලක මෝටර් රථ අත්හදාබැලීම් සිදුවන අතර මෝටර් රථ සමාගම් කිහිපයක්ම මේ සඳහා බෙහෙවින් උනන්දු වන බව වාර්තා වී ඇත.
 
(බීබීසී ඇසුරිණි - 085)