කෙන්යාවේ නයිරෝබි නුවර විදෙස් සංචාරකයන් ගැවසෙන ‘වෙස්ට්ගේට්’ සුපිරි වෙළෙඳ සංකීර්ණයේ ගැටුම් පෙරේදා (24) රාති‍්‍රය වෙද්දී අවසන් වූ බව එරට ජනාධිපති උහුරු කෙන්යාටා ජාතිය අමතමින් කියා සිටියේය.

කෙන්යානු ජනපති ජාතිය අමතමින්


ගැටුම් අවසන් වූයේ ප‍්‍රහාරයට පැමිණි අල් ෂෙබාබ් ත‍්‍රස්තවාදීන් 5 දෙනකු මරා දමීමෙන් පසුවය. සැකපිට තවත් 11 දෙනෙකු අත්අඩංගුවට ගෙන ප‍්‍රශ්න කරන බවද කෙන්යානු ආරක්ෂක අංශ කියා සිටී.

‘‘සිව් දිනක් තිස්සේ පැවැති ගැටුම්වලින් පසු ත‍්‍රස්තවාදීන් මරා දමා සාප්පු සංකීර්ණය අත්පත් කර ගැනීමට ආරක්ෂක අංශ සමත් වුණා” යැයි ජනාධිපති උහුරු කෙන්යාටා කියා සිටියේය.

අවි ගැටුම් නිමා වෙද්දී, සිව් මහල් සාප්පු සංකීර්ණයේ ඉහළ මහල තුනට බරපතළ හානි සිදුවී ඇති බව ද ජනාධිපති උහුරු කෙන්යාටා කියා සිටියේය.
ප‍්‍රහාරයෙන් 73 දෙනකු ජීවිතක්ෂයට පත් වූ අතර, 200 කට ආසන්න පිරිසක් තුවාල ලැබූහ. ඔවුන් වෙනුවෙන් තෙදින ශෝක කාලයක් ප‍්‍රකාශයට පත් කරන බව ද ජනපතිවරයා අවධාරණය කළේය.