ආර්ථික උද්ධමනය සහ වියදම් කපා හැරීමට රජය ගත් තීරණයට එරෙහිව ස්පාඤ්ඤයේ පමණක් නොව බි‍්‍රතාන්‍යයේ වැසියෝ ද ඊයේ (13) වීදි බැස විරෝධතා පැවැත්වූහ. ස්පාඤ්ඤයේ මැඞ්රිඞ් නුවර පුවර්ටා දෙල් සොල් චතුරස‍්‍රයට එක් රොක් වූ දහස් ගණනක් විරෝධතාකරුවෝ රජයට දොස් නඟන්නට වූහ. රටේ තරුණ තරුණියන්ගෙන් අඩකට වැඩි පිරිසකට රැකියා නොමැති බවත් රැකියා නොමැතිව සියයට 24 කට වැඩි පිරිසක් සිටින බවත් විරෝධතාකරුවෝ චෝදනා කරන්නට වූහ. මැඞ්රිඞ් නුවරට අමතරව ස්පාඤ්ඤයේ තවත් නගර 80ක විරෝධතා රැලි පැවැත්වුණු බව වාර්තා විය. බි‍්‍රතාන්‍යයේ විරෝධතා ආරම්භ වුණේ පසුගිය සතියේ සිටය. ඉකුත් බ‍්‍රහස්පතින්දා සේවක සහන කප්පාදු කිරීමට එරෙහිව ලන්ඩන් නුවර පොලිස් නිලධාරීහු ද විරෝධතා රැලියක් පැවැත් වූහ. ඊයේ දිනයේ බි‍්‍රතාන්‍යයේ ලන්ඩන් නුවර මහ බැංකු ගොඩනැගිල්ලට රැස්වූ විරෝධතාකරුවන් මර්දනය කිරීමට පොලිසිය යෙදවිණි. එහිදී පොලිසිය සමඟ ගැටුම් ඇති කර ගත් 12 දෙනෙක් අත්අඩංගුවට පත්වූහ. එම විරෝධතාවට 900 කට ආසන්න විරෝධතාකරුවෝ පිරිසක් සහභාගී වූහ. ඇමෙරිකාවේ පැවැත්වෙන ‘ඔකියුපයි වෝල්ස්ටී‍්‍රට් විරෝධතාකරුවන් සිහි ගන්වමින් ලන්ඩන් නුවර විරෝධතාකරුවන් තමන්ව හඳුන්වා ගත්තේ ‘ඔකියුපයි ලන්ඩන්’ යනුවෙනි.