ගිනස්වාර්තා කමිටුව විසින් මීට සති දෙකකට පෙර ලොව වයස්ගතම පුද්ගලයා ලෙස නම් කරන ලද 115 වියැති ඞීනා මැන්ෆ්‍රෙඩිනි නමැති මිත්තණිය ඊයේ(18) සිය දිවියෙන් සමුගත්තාය. ඉතාලියේදී උපත ලද මැන්ෆ්‍රෙඩිනි මිය ගියේ ඇමෙරිකාවේ අයෝවා ප‍්‍රාන්තයේ විශ‍්‍රාම මධ්‍යස්ථානයකදීය. ඇය ලොව වයස්ගතම පුද්ගලයා ලෙස මීට දින 13කට ඉහතදී නම් කරනු ලැබිණි. ඒ, අවුරුදු 116ක් වයසැති ඇමෙරිකානු ජාතික බෙසී කූපර් මෙලොවින් සමුගැනීමත් සමඟය. ඈ උපන්නේ 1897 අප්‍රෙල් 4 වැනිදාය. ඞීනාගේ අභාවයෙන් අනතුරුව දැන් ලොව වයස්ගතම පුද්ගලයා ලෙස වාර්තා පොත් අතරට එක්ව ඇත්තේ අවුරුදු 115 වයසැති ජපාන ජාතික ජිරෝමොන් කිමුරාය. කෙසේ වූවත් අඩුම දින ගණනක් එම වාර්තාවට හිමිකම් කියූ පුද්ගලයා ලෙස ඇය ඉතිහාසගත නොවේ.ලොව වයස්ගතම පුද්ගලයා ලෙස නම් කර දින හතරකට පසුව මියගිය ඇමෙරිකානු ජාතික එමා ටිල්මාන් අඩුම දින ගණනක් එම වාර්තාවට හිමිකම් කියූ පුද්ගලයා ලෙස වාර්තා වේ.