රුසියාවේ ඉල්ලීම සැලකිල්ලට ගනිමින්, එක්සත් ජාතීන්ගේ සාමාජික රටවල අධීක්ෂණය මැද, තමන් සතු රසායනික අවි වගකිවයුතු පාර්ශ්වයන්ට බාර දීමටත්, එම අවි නිෂ්පාදන කම්හල් ගැන තොරතුරු ඔවුන්ට හෙළිකිරීමටත් සූදානම් යැයි සිරියානු රජය ඊයේ (11) නිවේදනය කළේය.

සිරියානු රජය එම තීරණය ගත්තේ, රුසියානු ජනපති ව්ලැඩිමීර් පුටින් ප‍්‍රමුඛ රුසියානු රජය කළ යෝජනාවකට කැමැත්ත පළ කරමිනි. සිරියානු රජයට රුසියාව සහාය දෙයි. සිරියාව එම තීරණය ගත්තේ, ඇමෙරිකාව සිරියාව සම්බන්ධයෙන් හමුදාමය මැදිහත් වීමක් කිරීමට සූදානම් වෙමින් සිටිද්දීය.
සිරියාවට පහර දෙනවද නැද්ද සම්බන්ධයෙන් ජනපති ඔබාමා සැකැසූ යෝජනාවලියක් පෙරේදා (10) එරට කොංග‍්‍රස් මණ්ඩලයේ දී විවාදයට ගැනීමට නියමිතව තිබුණි.

සිරියානු රජය ගත් තීරණය හේතුවෙන්, ජනාධිපති ඔබාමා ඊයේ කියා සිටියේ, සිරියාව ගත් එම තීරණයට තම අනුමැතිය ලබා දෙන බවත් සිරියාවට එරෙහිව කඩිමුඩියේ හමුදා ප‍්‍රහාරයක් එල්ල නොකරන බවත්ය.

සිරියා රජය ඔවුන් සතු රසායනික අවි තොග ඇති ස්ථාන සම්බන්ධයෙන් විස්තර එක්සත් ජාතීන්ගේ සාමාජික රටවල නියෝජිතයන්ට ලබාදෙනතුරු තම යෝජනාව විවාදයට නොගැනීමටත් එය දින කිහිපයක් ප‍්‍රමාද කිරීමටත් ජනපති ඔබාමා තීරණය කළේය.

සිරියානු රජයට එරෙහිව හමුදාමය කි‍්‍රයා මාර්ගයක් ගැනීමට ඇමෙරිකාව සූදානම් වෙද්දී, ඇමෙරිකාව මෙන්ම බි‍්‍රතාන්‍යය ද කියා සිටියේ ලබන සිකුරාදාට පෙර, සිරියානු රජය ඔවුන් සතු රසායනික අවි ජාත්‍යන්තර ප‍්‍රජාවට බාර දීමටත් කටයුතු කරන්නේ නම්, සිරියාවට එරෙහිව හමුදාමය කි‍්‍රයා මාර්ගයක් නොගන්නා බවය.

සිරියානු ජනාධිපති බෂීර් අල් අසාද්ගේ රජය, ඇමෙරිකාව හෝ බි‍්‍රතාන්‍යය හෝ කළ එම යෝජනාව ට කන් නොදුන්නේය. කෙසේ නමුත් රුසියාව මැදිහත් වී ඒ ගැන දිගින් දිගටම කරුණු පැහැදිලි කිරීමක් කළ නිසා සිරියානු රජය ඊට කැමැත්ත පළ කළේය.

මේ අතර, විදෙස් පුවත් සේවා වාර්තා කර ඇත්තේ, ඇමෙරිකාව සිරියාවට එරෙහිව දින තුනක ප‍්‍රහාරයක් සැලසුම් කර ඇති බවය. එම ප‍්‍රහාරයට ගුවන් ප‍්‍රහාර පමණක් ඇතුළත් කිරීමට ද ඇමෙරිකා ආරක්ෂක අංශ ප‍්‍රධානීන් තීරණය කර ඇතැයි වාර්තා වේ.

සිරියානු රජයේ සහ හමුදාවේ හඳුනාගත් මර්මස්ථාන 50 ක් ඉලක්ක කර ගනිමින්, ප‍්‍රහාර එල්ල කිරීමට අවධානය යොමු වී ඇතැයි ද පෙන්ටගනය කළ නිවේදනයක් උපුටා දක්වමින් විදෙස් පුවත් සේවා අනාවරණය කර ඇත.

ප‍්‍රබල සාක්ෂි නොමැතිව, එක්සත් ජාතීන්ගේ ආරක්ෂක මණ්ඩලයට පිටුපා, සිරියානු රජයට එරෙහිව හමුදාමය කි‍්‍රයා මාර්ගයක් ගැනීමට ඇමෙරිකාව පෙළඹුණොත්, තමන් සිරියානු ජනපති අසාද්ගේ රජයට සහාය දෙන බව රුසියානු ජනපති ව්ලැඩිමීර් පුටින් ඇමෙරිකානු ජනපති බැරැක් ඔබාමාට අනතුරු අඟවා ඇත.

සිරියානු අර්බුදය වසර දෙකක් තිස්සේ දිග් ගැස්සුනේ, ඇමෙරිකාව, බි‍්‍රතාන්‍යය සහ ප‍්‍රංශය සිරියානු කැරැලිකරුවන්ට සහාය දෙද්දී, රුසියාව සහ චීනය සිරියානු ජනපතිගේ රජයට සහාය පළ කිරීම නිසාය.