වසර හතරකට වරක් යුරෝපයේ රටවල් අතර පැවැත්වෙන යුරෝපා පාපන්දු ශූරතාවය අද (10) ශ්‍රී ලංකාවේ වේලාවෙන් රාත‍්‍රී 12.30ට ආරම්භ කිරීමට නියමිතය.

පසුගිය නොවැම්බර් මස 13 වැනිදා ත‍්‍රස්ත ප‍්‍රහාරයට ලක්වූ පැරීසියට නුදුරින් පිහිටි ප‍්‍රංශයේ ජාතික ක‍්‍රීඩාංගනය වන ස්ටැඩ්ඩෙ ලා ප‍්‍රාන්ස් ක‍්‍රීඩාංගනයේදී ප‍්‍රංශ ජනාධිපති ප‍්‍රංශුවා ඔලොන්ද් ගේ ප‍්‍රධානත්වයෙන් එය ඇරැඹේ.

ප‍්‍රථම තරගය ප‍්‍රංශය හා රුමේනියාව අතර පැවැත්වේ. තරගාවලියේ අවසාන මහා තරගය ජුලි 10 වැනිදා ස්ටැඩ්ඩෙ ලා ප්‍රාන්ස් ක‍්‍රීඩාංගණයේදීම පැවැත්වීමට යයි.

ලෝක පාපන්දු කුසලානයට පමණක් දෙවැනි වන යුරෝ කුසලානය සඳහා රටවල් 24ක් සහභාගිවේ. මින් පෙර රටවල් 16ක් අතර පැවැති තරගාවලියට මේ වසරේ සිට රටවල් 24ක් සහභාගි කරවා ගැනීමට තීරණය වී ඇත.

ඒ අනුව ඇල්බේනියාව, ස්විට්සර්ලන්තය, රුසියාව, එංගලන්තය, වේල්සය, ස්ලෝවේනියාව, යුක්රේනය, ජර්මනිය, පෝලන්තය, උතුරු අයර්ලන්තය, ස්වීඩනය, ඔස්ටි‍්‍රයාව, පෘතුගාලය, අයිස්ලන්තය, හංගේරියාව, ස්පාඤ්ඤය, චෙකෝස්ලෝවැකියාව, තුර්කිය, ක්‍රෝඒෂියාව, බෙල්ජියම, ඉතාලිය හා අයර්ලන්තය යන රටවල් මෙවර ශූරතාවයට තරග වදී. මේ සඳහා ප‍්‍රංශයේ පාපන්දු ක‍්‍රීඩාංගන 10ක් සූදානම් කර ඇති අතර ලක්ෂ 25ක ජනතාව ක‍්‍රීඩාංගණ තුලදීත් ලක්ෂ 65ක ජනතාවක් එළිමහන් රූපවාහිනී තිරයන් මගින්ද තරග නැරඹීමට පැමිණෙතැයි සංවිධායකයෝ බලාපොරොත්තු වෙති.

ප‍්‍රංශ පොලිස් භටයන් 77000ක්ද පුද්ගලික ආරක්ෂක භටයන් 13000ක්ද තරගාවලියට ආරක්ෂාව සපයයි. ඒ සමගම ප‍්‍රංශයේ විශේෂ ප‍්‍රහාරක පොලිස් කණ්ඩායම් දෙක බැගින් සෑම පාපන්දු කන්ඩායමකටම පැය 24 පුරා ආරක්ෂාවට යොදවා ඇත.

මේ දිනවල ප‍්‍රංශයේ පවතින වර්ජන, ගර්ජන, ඟංවතුර ආදි විපත් හා අභියෝග ඉදිරියේ තම රටේ ගෞරවය ආරක්ෂා වන පරිදි යූරෝ කුසලානය පැවැත්වීමට බලාපොරොත්තු වන බව ප‍්‍රංශයේ ක‍්‍රීඩා හා තරුණ කටයුතු ඇමති පැට්රික් කනෙර් පැවැසීය.

le-stade-de-france-a-saint-denis-en-2010_5412681 saint-denis-stade-de-france-1760