විවාහ වී ගතකර ඇති වසර 56 ක් පුරා තම බිරිඳ ඇදුම් පැළදුම් 55,000 කට අධික සංඛ්‍යාවක් මිලදී ගෙන දී ඇති ස්වාමිපුරුෂයෙක් ඇමරිකාවේ සිටී.

පෝල් බ්‍රොක්මන් උපතින් ජර්මන් ජාතිකයකු වන අතර ඔහුගේ බිරිය මාර්ගොට්ය. විවාහ වූ අලූත ජර්මනිය අතහැර ඇමරිකාව බලා එන පෝල් ඉදිකිරීම් ක්ෂේත‍්‍රයේ රැකියාවක් සොයා ගෙන ක‍්‍රමයෙන් දියුණුවෙන් දියුණුවට පත්වන්නේ අවසානයේ තමන්ගේම කියා ඉදිකිරීම් සමාගමක්ද පිහිටුවා ගනිමිනි.

පෙම්වතුන් වී සිටි කාලයේ සිටම පෝල මාර්ගොට්ට නිතරම පාහේ ඇදුම් මිලදී ගෙන දීමට පුරුදුව සිටියේය.ඉදිකිරීම් සමාගම පිහිටුවාගැනීමෙන් පසු පෝල් ගේ මේ පුරුද්ද තවත් වැඩිවූ බව මාර්ගොට් කියන්නීය. උදයේ වැඩට යන පෝල් හවසට ගෙදර එන්නේ විවිධාකාර ඇදුම් ආයිත්තම් 30 - 40 පමණ උස්සාගෙන බව ඇය සිහිපත් කරන්නීය.

තම බිරිය ඇදුම් පැළදුම් පස්සේ දුවන්නියක නොවන බව කියන පෝල් ඇය වඩාත් කැමති නිවසට වී එය පිළිවෙළට තබා ගැනීමට බව පවසයි.පිස්සුව ඇත්තේ තමාට බැවින් තම බිරිද ඇයට සුදුසු ඇදුම් තේරීමේ වගකීම තමන්ටම භාරදී ඇතැයි ඔහු කියයි.මෙනිසා ඇයට සුදුසු වේ යැයි සිතෙන ඇදුමක් ඇස ගැටුණු සැනින් තමන් එය මිලයට ගන්නා බව පෝල් පවසන්නේ සිනාමුසුවය.

ආදරය ඇදුම් වලින් මැනිය හැකිවේ නම් පෝල් අභිභවා යාමට කිසිවෙකුටත් නොහැකි වන බව නම් සහතිකය.