බෙදුම්වාදී මුස්ලිම් සටන්කාමීන්ගෙන් ප‍්‍රහාර එල්ල වේවි යැයි බියක් හට ගැනීමත් සමඟ ප‍්‍රචණ්ඩත්වය රජයන දකුණු තායිලන්තයේ පාසල් සිය ගණනක් ඊයේ (27) සිට තාවකාලිකව වසා දැමීමට බලධාරීහු තීරණය කළහ. දින නියමයක් නොමැතිව තාවකාලිකව වසා දැමීමට තීරණය කර ඇත්තේ පටානී පළාතේ පාසල් 321 කි. ඊට හේතු වූයේ කලාප අධ්‍යාපන නිලධාරියකු සටන්කාමීන් අතින් වෙඩි කා ඝාතනය වීමය. මේ වනවිට බෙදුම්වාදීන් එල්ල කළ ප‍්‍රහාරවලින් අධ්‍යාපන නිලධාරීන් සහ ගුරුවරුන් 150 දෙනකු ජීවිතක්ෂයට පත් ව ඇත. පටානී පළාතේ ගුරු සංගම් තායිලන්ත රජයෙන් ඉල්ලා ඇත්තේ ඔවුන්ගේ ආරක්ෂාව තහවුරු කිරීමට කඩිනමින් පියවර ගන්නා ලෙසටය. තායිලන්තයේ මැලේ මුස්ලිම් සුළුතර ජනයාගේ දුක්ගැනවිලි සම්බන්ධයෙන් කටයුතු කිරීමට එරට රජය අපොහොසත් වීම මේ අර්බුදකාරී තත්ත්වයට හේතුවී තිබෙන බව වාර්තා වේ. හමුදා සාමාජිකයන්ගෙන් සිදුවන අකටයුතු මෙන්ම එම ජනතාවගේ වාර්ගික අනන්‍යතාව, භාෂාව සහ ආගමට නිසි තැනක් නොලැබීමද මීට හේතුවී ඇතැයි දේශපාලන විශ්ලේෂකයෝ පෙන්වා දෙති. 2004 වසරේ සිට පවතින බෙදුම්වාදී ප‍්‍රචණ්ඩ කි‍්‍රයා හේතුවෙන් මේ වනවිට දකුණු තායිලන්ත වැසියන් 5,300 දෙනකු ජීවිතක්ෂයට පත් ව ඇති බව ද වාර්තා වේ.