දින තුනක් පුරා ගිනිකොනදිග බංග්ලාදේශයට ඇද හැළුණු ධාරාණිපාත වැසි හේතුවෙන් හටගත් ගංවතුර තත්ත්වයෙන් සහ  නායයෑම්වලින් 90 දෙනකු ජීවිතක්ෂයට පත්ව ඇතැයි එරට ආපදා කළමනාකරණ අංශ ප‍්‍රකාශකයෙක් සඳහන් කළේය. කඳුකර ප‍්‍රදේශයක් වන චිතගොං පළාතට මෙම ස්වභාවික ආපදාවෙන් විශාල හානියක් සිදුවී ඇති බවත් ගංවතුරට මැදි වූ සහ නායයෑම්වලට ගොදුරු වූ පුද්ගලයන් මුදා ගැනීම සඳහා සහන සේවකයන් යොදා ඇති බවත් ඔහු වැඩිදුරටත් සඳහන් කළේය. චිතගොං පළාතටත් ඊට යාබදව පිහිටි කොක්ස් බසාර් සහ බන්දර්බන් යන ප‍්‍රදේශවල වෙසෙන ජනයා ද මෙසේ අධික වැසි තත්ත්වය නිසා හට ගත් ආපදාවන්ට මුහුණපා ඇතැයි වාර්තා වේ. බන්දර්බන් ප‍්‍රදේශයේ සිදු වූ නායයෑම්වලට හසුවූ තිස් දෙදෙනකුගේ මළ සිරුරු ගොඩ ගැනීමට හැකි වූ බව සහන සේවකයෝ පවසති. මෙලෙස ආපදාවන්ට ලක්වූවන් බේරා ගැනීමේ මෙහෙයුම්වල නිරත සහන සේවකයන් පවසන්නේ අධික වර්ෂාව සහ ගංවතුර තත්ත්වය හේතුවෙන් ප‍්‍රදේශයේ සන්නිවේදන කටයුතු ඇන හිට ඇති බවත් එය තම කටයුතුවලට බාධාවක්ව ඇති බවත්ය. නායයෑම් සිදු වූ බන්දර්බන් ප‍්‍රදේශයේ පොලිස් ප‍්‍රධානී සයිෆුල් අහමඞ් පැවසුවේ ප‍්‍රදේශවාසීන් බොහොමයක් රාතී‍්‍ර නින්දේ පසුවෙද්දී නායයෑම් සිදුව ඇති බවත් නායයෑම් ඇති වීමේ අවදානම තවම පහව ගොස් නැති බවත්ය. පැය 12ක් තිස්සේ චිතගොං වරාය ආශි‍්‍රත ප‍්‍රදේශයට සෙන්ටිමීටර් 40ක වර්ෂාවක් ඇදහැළුණු බව එරට කාලගුණවිද්‍යා දෙපාර්තමේන්තුව පවසයි. මෙම වර්ෂා තත්ත්වය හේතුවෙන් මේ වන විට පනස්දහසකට අධික පිරිසක් අවතැන්ව ඇති බවත් බොහෝ දෙනකු සිය ආරක්ෂාව පිණිස උස්බිම්වලට පැමිණ ඇති බවත් ආපදා කළමනාකරණ අංශ පෙන්වා දෙයි. චිතගොං නගරයේ සිට රටේ අනෙකුත් ප‍්‍රදේශ දක්වා විහිදී තිබෙන දුම්රිය මාර්ග පද්ධතිය ද හානියට පත්ව ඇති බවත් එක් දුම්රිය පාලමක් ගංවතුර තත්ත්වය හේතුවෙන් සම්පූර්ණයෙන්ම කඩා වැටී ඇති බවත් වාර්තා වේ.