අතීතයේ ද්වන්ධ සටන්වලදී භාවිතයට ගත් ලෝහමය නිය සහිත බළලකුගේ අත් වලට සමාන මැටි අත් දෙකක් හමුවී ඇතැයි පේරු රාජ්‍යෙය් පුරාවිද්‍යාඥයෝ පවසති. මෙය සොයාගෙන ඇත්තේ පේරු රාජ්‍යයේ උතුරේ ටර්ජිලෝ ආසන්නයේ පිහිටි හුආනා ඩි ලා ලුනා ඩින් නමැති පැරණි පිරමීඩයකිනි.

අතක හැඩයට තනා ඇති මේ මැටි පුවරු දෙකෙහි තියුණු ලෝහමය නියපොතු සවිකැර තිබේ. අදින් වසර 1500ට වඩා පැරණි මේ මැටි අත් පුවරු ඇතැම් විට ක්‍රිස්තු පූර්ව 800 දක්වා ඈත අතීතයකට අයිති විය හැකියැයි ද පුරාවිද්‍යාඥයෝ කියති.

පැරණි ඉන්කා ශිෂ්ඨාචාරයේ දී ශක්තිමත් පුද්ගලයන් අතර පැවති ද්වන්ධ සටන් වලදී සත්ත්ව හමෙන් නිර්මාණය කරන ලද සම්පූර්ණ යුද ඇඳුමකට මෙය සවිකැර තිබෙන්නට ඇතැයි ද පර්යේෂකයන්ගේ මතයයි. ද්වන්ධ සටනක දී පරාජය ලබන්නා මරා දැමීමට මෙය භාවිතා කරන්නට ඇති බවත් එය ඉතා භයානක අවියක් බවත් පවසන පර්යේෂක කණ්ඩායමේ ප්‍රධානී පුරාවිද්‍යාඥ සැන්ටියාගෝ උකේඩා පවසන්නේ බිලි පූජා සඳහා ද මෙවැනි අවි යොදා ගන්නට ඇති බවයි.

පිරමීඩයේ අභ්‍යන්තරයේ පැවති කුටියක තිබී සෙංකෝලයක් වැනි කොටසක් ද යුද ඇඳුම් සඳහා භාවිතාකරන කන් ආවරණ සහ මුහුණු ආවරණ ද සොයාගෙන තිබේ. මෙම අවිය නිශ්චිතව කාල නිර්ණය කිරීමේ කටයුතු දැනටමත් ආරම්භ කැර ඇති අතර ඒ සඳහා මාස හයක පමණ කාලයක් ගතවනු ඇතැයි ද පර්යේෂකයෝ කියති.