ඉන්දියාවේ පතන්කොට් හි ප්‍රහාරය ප්‍රබල හස්තයක ක්‍රියාවක් බවත් එය දේශපාලනික ගැටළුවක් බවට පත්කර නොගන්නා ලෙස දේශපාලන පක්ෂවලින් ඉල්ලා සිටින බවත් පන්ජාබ් මහ ඇමැති ප්‍රකාශ් සිංග් බදල් අද (3) පැවසූ බව එන්ඩීටීවී පුවත් සේවය පවසයි.

සෙනසුරාදා (2) ඉන්දු පකිස්ථාන දේශ සීමාව ආසන්නයේ පිහිටි පතන්කොට් නගරයේ ගුවන් හමුදා කඳවුරේ සිදුවූ වෙඩි හුවමාරුවකින් ත්‍රස්තවාදීන් දෙදෙනකු හා ගුවන් හමුදා සාමාජිකයන් දෙදෙනකු මිය ගියහ.

පතන්කොට් ප්‍රහාරය ඉතා අවාසනාවන්ත සිදුවීමක් බවත් මධ්‍යම රජය හා ඉන්දීය රජය එකමුතුව කටයුතු කළ යුතු බවත් පන්ජාබ් මහ ඇමැතිවරයා පෙන්වා දෙයි.

මෙවැනි සිදුවීම් මගින් ජාතියේ එකමුතුබවට හා පරිපූර්ණත්වයට හානි සිදුකර නොගත යුතු බවත් බදල් කියා සිටී.
ත්‍රස්ත ප්‍රහාරය වැළැක්වීමට කටයුතු කළ ආරක්ෂක අංශ සාමාජිකයන්ට ජාතියේ ප්‍රණාමය හිමිවන බවද මහ ඇමැතිවරයා සඳහන් කරයි.

එමෙන්ම එහිදී දිවිදුන් සෙබළුන්ගේ පවුල්වල අයට විශේෂ ගෞරවය පුද කර ඔවුන්ගේ අනාගතය වෙනුවෙන් ඔවුන්ට උදව් උපකාර හා ජාතික යුතුකම් ඉටු කරන බවද බදල් පවසයි.