කාන්තා අධ්‍යාපන අයිතිය වෙනුවෙන් පෙනී සිටීම නිසා තාලිබාන් වෙඩි උණ්ඩයෙන් පහර ලැබුවද තම ධෛර්යය නිසාම ජීවිතය ජයගත් කුඩා වීරවරිය මලාලා යුසාෆ්සායි හට නැවත වරක් එම සංවිධානයෙන් මරණ තර්ජන එල්ල  වී ඇත.

මලාලා යුසාෆ්සායි යනු ඉස්ලාම් දහමේ ආචාර ධර්ම නොසළකන තැනැත්තියක් යැයි හඳුන්වාදී ඇති තාලිබාන් සංවිධානය යළිත් අවස්ථාවක් ලැබුණහොත් ඇය කෙසේ හෝ ඝාතනය කරන බව පවසමින් නිවේදනයක්ද නිකුත් කර ඇත.

මලාලා යුසාෆ්සායි හට තාලිබාන් තුවක්කුකරුවෙකුගේ වෙඩි ප්‍රහාරයකට මුහුණ දීමට සිදුවූයේ පසුගිය වසරේ ඔක්තෝබර් මාසයේදීය. එම සංවිධානයේ වෛරයට ලක්වීමට ඇය කළ එකම වරද පාකිස්තානයේ තමන් වාසය කළ ප්‍රදේශයේ ජීවත් වූ කාන්තාවන්ගේ අධ්‍යාපනය ලැබීමේ අයිතිය වෙනුවෙන් පෙනී සිටීමය.

තම පියාගේ සහය ඇතිව ඇය බ්ලොග් අඩවියක්ද පවත්වාගෙන ගොස් තිබූ අතර විදේශයන්හි මාධ්‍යවේදීන් ද පකිස්තානයේ කාන්තා අධ්‍යාපන අයිතිය පිළිඹදව දැනුම්වත් කිරීමටත් කටයුතු කර තිබුණි.

ඇයගේ මෙම වැඩකටයුතු තාලිබාන් සංවිධානයේ ඇහේ කටු අනින්නාක් වැනි වූ අතර දිනෙක පාසල නිමවී බසයෙන් නිවස බලා පැමිණෙමින් සිටි ඇයට බසයට නැගගත් තලේබාන් තුවක්කතරුවෙකුගේ වෙඩි ප්‍රහාරයට ලක්වීමට සිදුවූයේ එම සංවිධානයේ වචනයට එරෙහිව යාමේ වරදටය.

වහා ඇය රෝහල් ගත කළ අතර පාකිස්තානයේ පහසුකම් මද වීමෙන් ඇයව බි්‍රතාන්‍යය කරා ගෙන එනු ලැබීය. ඇය පිළිඹද ලෝකයේම අවධානය යොමුවන්නට ගත්තේ ඉන්පසුවය.

වෙඩි පහරින් සිදුවූ තුවාල බරපතල වුවද ඇය සුවය ලැබුවාය.

තම අරමුණ කරා යෑමට දැක්වූ ධෛර්යය හා කැපවීම නිසාවෙන්ම ඇය ලෝකයේම ගෞරවයට ලක්වූවාය.එක්සත් ජාතීන්ගේ සංවිධානයේ තරුණ සැසිවාරය ඇමතීමේ විශේෂ අවස්ථාවද ඇයට හිමිවිය.

ඇයගේ නම නොඛෙල් සාම ත්‍යාගය ලැබීම සදහාද යොජනා වී ඇති බව සදහන්ය.

මලාලා දැන් තම පවුලේ අය සමග ජීවත් වන්නේ බ්‍රිතාන්‍යයේය.

බ්‍රිතාන්‍යය කාන්තාවන් හා සසදන කල්හි පකිස්තානයේ කාන්තාවන් දිවි ගෙවන්නේ අපායක බව ඇය කියන්නීය. කුමන තර්ජන එල්ල වුවත් ඔවුන් වෙනුවෙන් තමන් නිරතුරුවම පෙනී සිටිනා බව ඇය පවසන්නීය.