නවදිල්ලි අගනුවර ප‍්‍රධාන දුම්රිය පොළට බෝම්බ ප‍්‍රහාරයක් එල්ල කිරීමට පාකිස්තානයේ ‘ලෂ්කාර් ඊ තයිබා’ සටන්කාමීන් ගත් උත්සාහයක් ඉන්දීය ආරක්ෂක අංශ මැදිහත් වීමෙන් පෙරේදා (29) ව්‍යර්ථ කෙරුණි. නවදිල්ලි දුම්රිය පොළට ත‍්‍රස්ත ප‍්‍රහාරයක් එල්ල කිරීමට සැලැසුම් කරන බව ඉන්දීය බුද්ධි අංශ අනතුරු ඇඟවීමත් සමඟ නවදිල්ලි පොලිස් නිලධාරීන් වහාම කි‍්‍රයාත්මක වී බෝම්බය ඇටවූ බවට සැකපිට පුද්ගලයන් දෙදෙනකු අත්අඩංගුවට ගත් බව ද වාර්තා වේ. අත්අඩංගුවට ගත් සැකකරුවන් දෙදෙනා පාකිස්තාන ජාතිකයන් බව පැවසේ. ඔවුන් ‘ලෂ්කාර් ඊ තයිබා’ සටන්කාමී සංවිධානයට සම්බන්ධදැයි සෙවීමේ පරීක්ෂණ මේ වන විට ආරම්භ කර ඇති බව ඉන්දීය ස්වදේශ කටයුතු ඇමැති පී චිදම්බරම් මාධ්‍ය හමුවක් පවත්වමින් පැවැසීය. දුම්රිය පොළේ කාර්ය බහුල අවස්ථාවක බෝම්බය පුපුරුවා හැර මහා ජීවිත විනාශයක් සිදු කිරීමට ත‍්‍රස්තවාදීන් සැලැසුම් කර තිබුණු බව ද අමාත්‍යවරයා වැඩි දුරටත් කීය. අත්අඩංගුවට ගත් සැකකරුවන් දෙදෙනා දින 10 ක් රිමාඞ් භාරයේ තැබීමටත් ඉන්පසු අධිකරණය හමුවට ඉදිරිපත් කිරීමටත් නියමිතය. ‘ලෂ්කාර් ඊ තයිබා’ යනු පාකිස්තිනයේ කි‍්‍රයාත්මකව තිබෙන බලවත්ම සටන්කාමී සංවිධානයයි. ඇමෙරිකාව ප‍්‍රමුඛ ඇතැම් බටහිර බුද්ධි අංශ පවසන්නේ ‘ලෂ්කාර් ඊ තයිබා’ සටන්කාමීන්ට පාකිස්තාන රජයේ ද සහාය ලැබෙන බවය. 2008 වසරේ දී ඉන්දියාවේ මුම්බායි නුවරට එල්ල වූ ත‍්‍රස්ත ප‍්‍රහාරය සම්බන්ධයෙන් චෝදනා ලැබ සිටින්නෝ ද ‘ලෂ්කාර් ඊ තයිබා’ සටන්කාමීහුය. එම ත‍්‍රස්ත ප‍්‍රහාරයෙන් 166 දෙනෙක් ජීවිතක්ෂයට පත්වූහ. විදේශිකයෝ ද ඒ අතර වෙති.