නයිජීරියාවේ බොකෝ හරාම් ඉස්ලාමීය සටන්කාමීන්ගේ ප‍්‍රචණ්ඩ කි‍්‍රයා හේතුවෙන් එරට ජනාධිපතිවරයා වන ගුඞ්ලක් ජොනතන් රටේ ප‍්‍රදේශ කිහිපයකට හදිසි නීතිය ඊයේ (31) ප‍්‍රකාශයට පත් කළේය. පසුගියදා එල්ල වූ බෝම්බ ප‍්‍රහාරවලින්, තුනක් දේවස්ථාන ඉලක්ක කර ගෙන එල්ල වූ අතර එම ප‍්‍රහාර රට තුළ ගැටුම්කාරී තත්වයක් ඇති කිරීමේ අරමුණ ඇතිව බොකෝ හරාම් සටන්කාමීන් සිදු කළ බව එරට රජය පවසයි. ‘අප රටේ ආරක්ෂාව තහවුරු කරන බවට නයිජීරියා වැසියන්ට සහතික වෙනවා. ත‍්‍රස්තවාදයට සම්බන්ධ ආයතන සහ පුද්ගලයන් සොයා දැඩි දඬුවම් පමුණුවනවා’ යැයි ජනාධිපතිවරයා වැඩිදුරටත් කියා සිටියේය. සටන්කාමීන්ගේ මූලස්ථානය පිහිටි බෝර්නෝ නගරය ඇතුළු නගර කිහිපයකට හදිසි නීතිය ප‍්‍රකාශ කර ඇති බව පැවසූ ජනාධිපතිවරයා කිසිවෙකුටත් තර්ජනයක් නොවූ කණ්ඩායමක් ලෙස මුලදී සංවිධානය වූ බොකෝ හරාම් සටන්කාමීන් පසුව රටටම පිළිලයක් වූ බවත් ප‍්‍රකාශ කළේය. අපි‍්‍රකාවේ පිහිටි ප‍්‍රධාන රාජ්‍යයක් වන නයිජීරියාවේ මිලියන 160ක ජනතාවක් වාසය කරන අතර අපි‍්‍රකා මහද්වීපයේ විශාලතම තෙල් නිෂ්පාදකයා ද වෙයි. නයිජීරියාවේ උතුරු ප‍්‍රදේශයේ බහුතරය මුස්ලිම් වන අතර දකුණු ප‍්‍රදේශයේ බහුතරය කි‍්‍රස්තියානීන් වේ.