සූර්ය බලයෙන් පමණක් ක්‍රියාකරන ගුවන්යානයකින් ලොව වටා ගිය ගමන සාර්ථක ලෙස අවසන් කළ බව විදෙස් මාධ්‍ය වාර්තා කරයි. වසරකුත් මාස හතරක් ගතවූ මෙම දීර්ඝ චාරිකාව සූර්ය බලශක්තිය ප්‍රචලිත කිරීම සඳහා සංවිධානය කර තිබුණි. ‍  

සෝලා ඉම්පල්ස් ලෙස හඳුන්වනු ලැබූ යානය පසුගිය වසරේ මාර්තු මස නමවෙනිදා එක්සත් අරාබි එමීර් රාජ්‍යයේ අබුඩාබි ගුවන්තොටුපළින් ගමන් ඇරඹි අතර ලොව වටා කිලෝමීටර 42 000 ගමන් කර නැවත අබුඩාබි වෙත පැමිණ ඇත.

අදියර 17ක් යටතේ සිදුකළ මෙම පියාසැරිය මහද්වීප හතරක්, මුහුදු තුනක් හා සමුද්‍රයන් දෙකක් හරහා ගමන් කර තිබුණි. ස්විට්සර්ලන්ත ජාතික බර්ට්‍රැන්ඩ් පිකාඩ් හා ඇන්ඩ්‍රො බොෂ් බර්ග් යානය පැදවූහ.

දීර්ඝතම ගුවන් පියාසැරියට හිමි ලෝක වාර්තාව ඇතුළු තවත් වාර්තා 19ක් චාරිකාවේදී තබනු ලැබීය.