ටියුනීසියාවේ පසුගිය වසරේ ආරම්භ වූ ජනතා උද්ඝෝෂණ මර්දනය කිරීමට යෑමේදී, සිදුවූ මිනිස් ඝාතන සම්බන්ධයෙන් එවකට ජනපති ධුරය හෙබවූ බෙන් අලීට එරට අධිකරණයක් මගින් ජීවිතාන්ත සිර දඬුවමක් පෙරේදා (13) පනවනු ලැබීය. ජනතා විරෝධය හමුවේ ධුරයෙන් ඉවත් වූ ජනපති බෙන් අලී, බිරිය ද සමඟ සෞදි අරාබියට පලා ගියේය. මේ වනවිටත් ඔහු සිටින්නේ සෞදි අරාබියේය. ඔහුගේ සෞඛ්‍ය තත්ත්වය ද අයහපත් අතට හැරී ඇතැයි මාධ්‍ය වාර්තා කරයි. ටියුනීසියා අපරාධ අධිකරණය නඩු විභාගය පවත්වන ලද්දේ බෙන් අලීගේ සහභාගීත්වයෙන් තොරවය. අලීගේ අභ්‍යන්තර කටයුතු ඇමැති සෆීක් බෙල්හාජ් සහ බෙන් අලීගේ සමීපතමයන් කිහිප දෙනකුටද වසර 15 බැගින් සිර දඬුවම් හිමිවිය. කෙසේ නමුත් බෙන් අලීගේ ප‍්‍රධාන ආරක්ෂක නිලධාරී සහ එරට කැරැුලි මර්දන පොලිසියේ ප‍්‍රධානී මොනෝසෙෆ්ට එරෙහිව ඉදිරිපත් කරන ලද චෝදනා අධිකරණය විසින් නිෂ්ප‍්‍රභ කෙරුණි. මෙය ටියුනීසියා ජනතාවගේ දැඩි කෝපයට හේතු වී ඇත. මේ නිසා යළිත් වරක් ප‍්‍රචණ්ඩ කි‍්‍රයා ඇවිළී යෑමේ අවදානමක් ද හට ගෙන තිබේ.