චීන අභ්‍යවකාශ ඉතිහාසයේ උඩු ගුවනට ගිය පළමු කාන්තාවවීමේ ගෞරවය ලියු යෑං (33) හිමිකර ගත්තාය. පෙරේදා (16) ඇරඹි සෙන්ෂෝ-9 අභ්‍යවකාශ ගමනට එක්වීමත් සමඟ ඇයට මේ ගෞරවය හිමිවිය. චීනය මිනිසකු යොදාගෙන සිදු කළ සිවුවන අභ්‍යවකාශ ගමන ලෙස මෙය සැලකේ. ගගනගාමීන් තිදෙනකු රැගත් මෙම යානය ගෝබි කාන්තාරයේ පිහිටි ජියුකුවාන් අභ්‍යවකාශ මධ්‍යස්ථානයෙන් ගමන් ඇරඹීය. ලියු යෑං චීනයේ මහජන විමුක්ති හමුදාවේ ගුවන් නියමුවරියක් ලෙස කටයුතු කරමින් සිටින අතරතුර 2010 වසරේදී ගගනගාමියකු ලෙස තෝරා ගෙන ඇත. චීන අභ්‍යවකාශ වැඩසටහනේ නිලධාරියකු පැවැසුවේ ලියු යෑං සියලූ පුහුණුවීම් ලැබූයේ චීනය තුළ දී බවයි. මෙම යානය අභ්‍යවකාශයේ රඳවා ඇති ටියැගොන් -1 යානය හා සම්බන්ධවීමට නියමිතය.