භාණ්ඩ මිල ඉහළ යෑමට විරෝධය පළ කරමින් සහ සේවක අයිතිවාසිකම් වැඩි දියුණු කරන්නැයි ඉන්දීය අගමැති මන්මෝහන් සිංගේ කොංග‍්‍රස් පක්ෂ රජයට බල කරමින් ඊයේ (28) ඉන්දියාව පුරා මහා වැඩ වර්ජනයක්  පැවැත්විණි. ප‍්‍රාන්ත ගණනාවක පැවැති එම වැඩ වර්ජනයට පක්ෂ විපක්ෂ භේදයකින් තොරව වෘත්තීය සමිති කි‍්‍රයාකාරීන් සහ දේශපාලන කි‍්‍රයාකාරීහු ද එක්ව සිටියහ. වැඩ වර්ජනය ආරම්භ වූයේ පෙරේදා (27) මධ්‍යම රාති‍්‍රයේ සිටය. මිලියන ගණනක් දෙනා වැඩ වර්ජනයට එක් ව සිටි බව මාධ්‍ය වාර්තා කළේය. වැඩ වර්ජනය හේතුවෙන් ඉන්දියාවේ ප‍්‍රාන්ත රැසක ප‍්‍රධාන නගර ගණනාවක ගමනාගමන කටයුතු  අඩපණ විය. ව්‍යාපාරික ස්ථාන, රජයේ කාර්යාල, බැංකු සහ පාසල් ද වසා දමා තිබුණු බව ඉන්දීය පුවත් සේවා කියා සිටියේය. රජයේ දුරකතන සමාගම් සේවකයන් පවා වැඩ වර්ජනයට එක් ව සිටි අතර ඔවුන් කියා සිටියේ තම ඉල්ලීම්වලට රජය ඇහුම්කන් නොදෙන්නේ නම් දිගින් දිගටම වෘත්තීය සමිති ක‍්‍රියා මාර්ගවල නියැළීමට පසුබට නොවන බවය. වැඩ වර්ජනයට ඉන්දියාවේ ප‍්‍රධාන පෙළේ වෘත්තීය සංගම් 11 ක් සහාය පළ කළේය. දූෂණ වංචා චෝදනා හේතුවෙන් අර්බුද රැසකට මුහුණ දී සිටින ඉන්දීය අගමැති මහන්මෝහන් සිංගේ රජයට මෙම වැඩ වර්ජනය හිසරදයක් වනු ඇතැයි දේශපාලන විචාරකයෝ පෙන්වා දෙති. ”මේක සුවිශේෂී අවස්ථාවක් පක්ෂ විපක්ෂ භේදයකින් තොරව රටේ ප‍්‍රධාන පෙළේ වෘත්තීය සංගම් රැසක් පළමු වරට මෙම වැඩ වර්ජනයට එක් වෙනවා. අප රජයට බල කර සිටිනවා භාණ්ඩ මිල පහළ දමන ලෙසටත් සේවක අයිතිවාසිකම් වැඩි දියුණු කිරීමට වහා කටයුතු කරන ලෙසටත්” යැයි ඉන්දීය වෘත්තීය සමිති කොංග‍්‍රසයේ මහ ලේකම් ගුරුදාස් දාස් ගුප්තා මාධ්‍ය හමුවකදී කියා සිටියේය. ”අප රජය සමඟ කිහිප වරක් සාකච්ඡුා කළා. සේවකයන්ගේ ගැටලූ ඔවුන්ට ඉදිරිපත් කළා. ඔවුන්ට ඇති තරම් කාලයක් ලබා දුන්නා. ඒත් ඔවුන් නිහඬයි. වැඩ වර්ජනයක් පවත්වනවා හැර අපට වෙන විකල්පයක් නැහැ”යි මහ ලේකම් ගුරුදාස් වැඩි දුරටත් කියා සිටියේය. ජාතික අවම වේතනයක් ලබා දෙන ලෙසටත්, කෝටි පහක කොන්ත‍්‍රාත් සේවකයන්ට ස්ථිර රැකියා ලබා දීමට කටයුතු කරන ලෙසටත් ඉහළ යන ජීවන වියදම පහළ දැමීමට කටයුතු කරන ලෙසටත් වෘත්තීය සමිති රජයෙන් ඉල්ලා සිටියි.