ඉරානයේ විප්ලවීය හමුදාවට අයත් කඳවුරක සිදුවූ ප‍්‍රබල පිපිරීමකින් ඉහළ පෙළේ හමුදා නිලධාරියකු ඇතුළු සෙබළු 17 දෙනෙක් ජීවිතක්ෂයට පත්වූහ. පිපිරීමෙන් තුවාල ලැබූ සෙබලූන්ගේ ගණන 23 කි. පිපිරීම සිදුවූයේ බිඞ් ගානේ හමුදා කඳවුරේ ආයුධ ගබඩාවේය. පිපිරීම සිදුවූ සැණින් විදෙස් පුවත් සේවා ප‍්‍රකාශ කළේ 27 දෙනකු ඉන් ජීවිතක්ෂයට පත්වී ඇති බවය. එහෙත් ඉරාන හමුදා ආඥාපති රාමේසාන් ෂරීෆ් මාධ්‍ය හමුවක් පවත්වමින් කියා සිටියේ මියගිය ගණන 17 ක් පමණක් කියාය. පිපිරීම සිදුවූයේ පුපුරන ද්‍රව්‍ය තොගයක් ආයුධ ගබඩාවේ අසුරමින් සිටිද්දී බවත් එය සෙබළකුගේ අත්වැරදීමක් නිසා සිදුවූවක් බවත් ෂරීෆ් වැඩි දුරටත් හෙළිකර සිටියේය. පිපිරීමත් සමඟ ලෝකයේ බොහෝ දෙනා කලබලයට පත් වූයේ ඇමෙරිකාවෙන් හෝ ඊශ‍්‍රායලයෙන් හෝ ඉරානයට හමුදා ප‍්‍රහාරයක් එල්ල වෙන්න ඇති කියාය. 1979 වසරේදී ඉරානයේ විප්ලවීය හමුදාව පිහිටුවනු ලැබුවේ දේශීය වශයෙන් හෝ විදේශීය හෝ වශයෙන් හට ගන්නා  ඕනෑම සතුරු ප‍්‍රහාරයකට සාර්ථකව මුහුණ දිය හැකි ලෙසිනි. පසුගිය වසර කිහිපය පුරාවටම ඉරානයේ හමුදා ශක්තිය වැඩි කිරීමට විප්ලවීය හමුදා සෙබළු සමත් වූහ. ඉරානය පරමාණු බෝම්බ නිපදවන බවත් එය ලෝකයට තර්ජනයක් බවත් චෝදනා කරමින් ඇමෙරිකාව, ඊශ‍්‍රායලය සහ බි‍්‍රතාන්‍ය ඉරානයට එරෙහිව හමුදා ප‍්‍රහාරයක් එල්ල කිරීමට සූදානමින් සිටියි. කෙසේ නමුත් ඔබාමා පරිපාලනය අවධාරණය කර ඇත්තේ රාජතාන්ති‍්‍රක මට්ටමින් සම්බාධක පනවා ඉරානයේ විනාශකාරී න්‍යෂ්ටික වැඩසටහනට බාධා කරනවා මිසක් හමුදා ප‍්‍රහාරයක් සැලැසුම් නොකරන බවය.