මධ්‍යම ඉරාකයේ ෂියා මුස්ලිම්වරුන් රැස්ව සිටි ස්ථානයකට පෙරේදා(18) එල්ල වූ මරාගෙන මැරෙන බෝම්බ ප‍්‍රහාරයෙන් විසිදෙදෙනකු ජීවිතක්ෂයට පත්ව ඇති අතර 50 දෙනකු තුවාල ලබා ඇතැයි එරට හමුදා ප‍්‍රකාශකයෙක් පැවැසීය. සිය මියගිය ඥාතීන් වෙනුවෙන් ශෝකය පළ කිරීම පිණිස එක්රැස්ව සිටි ෂියා මුස්ලිම්වරුන් පිරිසකට මෙම බෝම්බ ප‍්‍රහාරය එල්ල වී ඇති බව ඔහු වැඩිදුරටත් සඳහන් කළේය. ප‍්‍රහාරයට ලක් වූවන් අතර හමුදා ලූතිනන්වරයකු, පොලිස් නිලධාරීන් සිව් දෙනකු සහ ආරක්ෂක අංශ සාමාජිකයන් හත් දෙනකු සිටි බව ද වාර්තා වේ. ෂියා මුස්ලිම් නායකයකුවන සාමි අල් මසුඩි ගමන් ගත් රථ පෙළ ඉලක්ක කරගෙන අටවා තිබූ බෝම්බ පිපිරීයාමේ සිද්ධියයෙන් දිනකට පසුව මෙම ප‍්‍රහාරය එල්ලවී තිබේ. මෙයින් අල් මසුඩිගේ ආරක්ෂක නිලධාරීන් තිදෙනකු තුවාල ලබා ඇත. ඉකුත් සති කිහිපය තුළ ෂියා මුස්ලිම්වරුන් ඉලක්ක කරගෙන බෝම්බ ප‍්‍රහාර ගණනාවක් එල්ල විය. මෙම ප‍්‍රහාර සම්න්ධයෙන් අදහස් දැක්වූ අල් මසුඩි කියා සිටියේ ඉකුත් සතියේදී ෂියා ආගමික නායකයන් සිය අනුගාමිකයන්ට අන්තවාදී ගැටුම් ඇවිළවීමට උත්සාහ ගන්නා මනුෂ්‍යත්වයට එරෙහි සතුරන්ගෙන් ප‍්‍රවේශම් වන ලෙස දන්වා තිබූ බවයි. ෂියා මුස්ලිම්වරුන් වෙත මෙසේ ප‍්‍රහාර එල්ල කිරීමේ අරමුණ ඉරාකයේ ෂියාවරුන් පාලනය හොබවන ඉරාක රජය පෙරළීම බව මසුඩි වැඩිදුරටත් කියා සිටියේය.