කොංගෝවෙන් ඉබෝලා වසංගතය පිළිබඳ තොරතුරු වාර්තා වීමත් සමඟ එරට සමඟ තිබෙන දේශසීමාව වසා දැමීමට රුවන්ඩාව පියවර ගෙන ඇත.
කොංගෝ රාජ්‍යයෙන් ඉබෝලා වසංගතය පිළිබඳ සිදුවීම් තුනක් වාර්තා වීමත් සමඟ රුවන්ඩාව එම පියවර ගත්තේය.

“දෙරටේම ජනතාව ඉබෝලා වසංගතය නිසා පීඩාවට පත්වුණා. ඒ නිසා සියලු දෙනාගේ ආරක්ෂාව වෙනුවෙන් දේශසීමාව වසා දැමීමට සිදුවනවා” යැයි රුවන්ඩා බලධාරීහු ප්‍රකාශ කළහ.

ඉබෝලා වසංගතය පැතිරුණු බවට තොරතුරු ලැබී ඇත්තේ කොංගොවේ ගෝමා නගරයෙනි. ගෝමා නගරය රුවන්ඩාව සහ කොංගෝව අතර දේශසීමාවේ පිහිටි නගරයකි. එම නගරයෙන් ඉබෝලා වෛරසය වැළඳුණු පුද්ගලයන් තිදෙනකු සම්බන්ධයෙන් තොරතුරු වාර්තා වී තිබේ.

ගෝමා නගරයේ මිලියන දෙකකට ආසන්න පිරිසක් ජීවත්වන අතර කොංගෝවේ ප්‍රධාන ප්‍රවාහන කේන්ද්‍රස්ථානයකි. මෙම නරගය රුවන්ඩාවේ ජුසෙනි නගරය හා සම්බන්ධ වේ. රුවන්ඩාවේ ජුසෙනි නගරයේ 85,000කට වැඩි පිරිසක් ජීවත් වෙති.

මෙම නගර දෙක අතර සබඳතා ඉතා ශක්තිමත් වන අතර බොහෝදෙනෙක් දේශසීමාවේ එහා මෙහා ගමන් කරමින් රැකියාවල නිරත වෙති. ඇතැම් අයගේ නිවාස ඇත්තේ අසල්වැසි නරගයේ ය. දරුවන් පාසල් අසල්වැසි රටට අයත් නගරයේ තිබෙන පාසල්වලටය.

රුවන්ඩාව ගෙන ඇති මෙම පියවර නිසා දෙරටේ බොහෝ පිරිසක් පීඩාවට පත්ව ඇති අතර රැකියාවට අසල්වැසි කොංගෝවේ ගෝමා නගරයට ගිය පිරිස්වලට නැවත නිවෙස් බලා යෑමට නොහැකි වී ඇතැයි ද පැවසේ. 
 
(ඒ.එෆ්.පී. ඇසුරිනි
 055)