ඉන්දියාව සහ පාකිස්තානය අතර ඇති වී තිබෙන මතභේදාත්මක තත්ත්වය සමථයකට පත් කිරීම සඳහා මැදිහත්කරුවකු ලෙස කටයුතු කිරීමට සූදානම් යැයි රුසියාව අද (28) ප්‍රකාශ කළේය. න්‍යෂ්ටික අවි හිමි අසල්වැසියන් වන ඉන්දියාව සහ පාකිස්තානය අතර තවදුරටත් ගැටුම් ඇතිවීමේ අවදානමක් ඇති බව පවසමින් අර්බුදය විසඳීමට මැදිහත් වීමට සූදානම් යැයි රුසියානු බලධාරීහු කීහ. 

ඉන්දු පාකිස්තාන අර්බුදය සමථයකට පත් කිරීම සඳහා ඇමෙරිකාව ද දෙරටට සහාය දීමට සූදානම් යැයි එක්සත් ජනපද ජනාධිපති ඩොනල්ඞ් ට්‍රම්ප් අද (28) පස්වරුවේ පැවැසීය. 

රුසියාව සහ ඉන්දියාව අතර සමීප සබඳතා පවතින අතර ඉන්දියාව විශාල වශයෙන් රුසියාවෙන් හමුදා උපකරණ මිලදී ගනි. පසුගිය කාලයේදී පාකිස්තානය සහ රුසියාව අතර තිබෙන සබඳතා ද වර්ධනය විය. 

“ඔවුන්ට අවශ්‍ය නම් අපි සූදානම් මැදිහත්කරුවකු වෙන්න” යැයි රුසියානු විදේශ අමාත්‍ය සර්ගේ ලැව්රොව් උපුටා දක්වමින් රුසියාවේ “ටාස්” පුවත් සේවය වාර්තා කර තිබිණි. 

අපට යම් කළ හැකි නම් එයත් ඕනෑම උපකාරයක් අවශ්‍ය නම් එයත් කිරීමට රුසියාව සූදානම් යැයි එරට විදේශ කටයුතු අමාත්‍යාංශයේ ප්‍රකාශික මාරියා සකාරෝවා පැවැසුවාය. 

රුසියානු විදේශ අමාත්‍ය සර්ගේ ලැව්රොව් ඊයේ (27) ඉන්දීය විදේශ ඇමතිනි සුෂ්මා ස්වරාජ් හා කතාබහ කර ඇතැයි ද වාර්තා විය.

රොයිටර් ඇසුරිනි  

055