ලබන වසර සඳහා අය වැය සම්මත කරගත නොහැකිව ඇමෙරිකාවේ හටගත් මූල්‍ය අර්බුදයෙන් ආසියාවට කිසිදු ආකාරයක බලබෑමක් සිදුනොවනු ඇතැයි ඇමෙරිකා රාජ්‍ය ලේකම් ජෝන් කෙරී, ඊයේ (10) බෲනෙහි පැවැත්වුණු ‘ආසියාන්’ රාජ්‍ය නායක සමුළුවේදී

සමුළුව අතරතුරේ ඇමෙරිකා රාජ්‍ය ලේකම් ජෝන් කෙරී තායිලන්ත අගමැතිනී යිංග්ලක් ෂිනවාත‍්‍රා සමඟ

අවධාරණය කළේය.

අග්නිදිග ආසියානු රටවල රාජ්‍ය නායක සමුළුව මෙවර පැවැත්වෙන්නේ 23 වැනි වරටය. එම සමුළුව අතරතුරේ, 8 වැනි නැගෙනහිර ආසියානු රාජ්‍ය නායක සමුළුව ද පැවැත්වෙයි. කලාපීය වෙළෙඳ සහ ආරක්ෂක කටයුතු සම්බන්ධයෙන් රාජ්‍ය නායකයන්ගේ අදහස් හුවමාරු වන්නේ මෙම සමුළුවේදීය.

සමුළුවට සහභාගී වීමට නියමිතව සිටියේ, ඇමෙරිකානු ජනාධිපති බැරැක් ඔබාමාය. එහෙත් හටගත් අර්බුදය හේතුවෙන් ඔබාමා සිය සියලූම විදෙස් සංචාර අවලංගු කර දැම්මේය.

ඔබාමා පරිපාලනය මුහුණ දුන් එම අර්බුදය ‘සුළු පසුබෑමක්’ බවත්, ආසියානු කලාපය කෙරෙහි ඇමෙරිකා රජය දක්වන උනන්දුව කිසිසේත්ම අඩු වී නැති බවත් රාජ්‍ය ලේකම් ජෝන් කෙරී යළිත් වරක් අවධාරණය කළේය.

ඇමෙරිකා ජනපති ඔබාමා සමුළුවට සහභාගී නොවීම නිසා, සමුළුවේදී නව ආයෝජන අවස්ථා රැසක් ඇති කර ගැනීමට රුසියාව සහ චීනය සමත් වීම කැපී පෙනුණු සිදුවීමක් විය.

ඇමෙරිකාවට අයවැය සම්මත කර ගැනීමට නොහැකි වී ඇත්තේ, ඇමෙරිකාවේ ඇමෙරිකාවේ මහජන නියෝජිත මණ්ඩලය සහ කොංග‍්‍රස් මණ්ඩලය අතර මත ගැටුමක් මුල්කර ගනිමිනි.

අයවැය සම්මත කර ගැනීම ඉකුත් 30 වැනිදා මැදියම් රැයින් අවසන් විය. ඒ අනුව ඉකුත් පළමු වැනිදා සිට, ඇමෙරිකාවේ මූල්‍ය කටයුතු අඩපණවූ අතර, රාජ්‍ය ආයතනවලින් කොටසක් වසා දැමීමට ද පියවර ගෙන ඇත.

මහජන නියෝජිත මණ්ඩලය සහ කොංග‍්‍රස් මණ්ඩලය අතර මත ගැටුමක් නිර්මාණය වූයේ, ජනපති බැරැක් ඔබාමාගේ සෞඛ්‍ය ආරක්ෂක පනත මුල්කොට ගනිමිනි. ප‍්‍රතිවාදී රිපබ්ලිකන්වරුන් කියා සිටින්නේ, එම පනත සංශෝධනය විය යුතු බවය.

ඇමෙරිකාවේ මහජන නියෝජිත මණ්ඩල බහුතර බලය ඇත්තේ ඔබාමාගේ ඩිමොක‍්‍රටික් පක්ෂයට නොව ප‍්‍රතිවාදී රිපබ්ලිකන් පක්ෂයටය.
අර්බුදය විසඳා ගැනීම සම්බන්ධයෙන් ජනපති ඔබාමා සහ ප‍්‍රතිවාදී රිපබ්ලිකන් පක්ෂ කතා නායක ජෝන් බූනේ අතර,  ඊයේ (10) දිනයේ දී ද සාකච්ඡුා පැවැත් වුණු බව ඇමෙරිකානු පුවත් සේවා වාර්තා කළේය.

ඉකුත් පළමු වැනිදා සිට එසේ වසා දමා ඇති රජයේ ආයතන වන්නේ, රජය යටතේ පවතින උද්‍යාන මෙන්ම වෙළෙඳ සහ මූල්‍ය ආයතනය. ආරක්ෂක සේවා සහ සෞඛ්‍ය සේවා ආදී අත්‍යාවශ්‍ය සේවා දිගටම කි‍්‍රයාත්මක වෙයි.

අර්බුදය කඩිනමින් විසඳා ගෙන අයවැය සම්මත කර ගැනීමට නොහැකි වුවහොත්, එම ආයතනවලට ද බලපෑම් එල්ල වීමේ අවදානමක් පවතින බව ජනපති ඔබාමා ජනතාවට පවසා ඇත.