ඇමෙරිකානු හමුදා සහ රාජ්‍ය තාන්ති‍්‍රක රහස් ලොවට හෙළි කිරීම සම්බන්ධයෙන් විකිලීක්ස් සංස්කාරක ජුලියන් ඇසෙන්ජ්ට එරෙහිව නඩු පැවැරීමට ඇමෙරිකාවේ නීතිවේදීන් හොර රහසේ කටයුතු කරන බව ඇසෙන්ජේගේ නීතීඥ බල්තසාර් ගාර්සොන් පවසයි. ඕස්ටේ‍්‍රලියානු ජාතිකයකු වන ඇසෙන්ජ් (41) මේ වනවිට රැඳී සිටින්නේ බි‍්‍රතාන්‍යයේ ලන්ඩන් නුවර පිහිටි ලතින් ඇමෙරිකානු රටක් වන එක්වදෝර තානාපති කාර්යාලයේය. ස්වීඩනයේ සිටිද්දී කාන්තාවන් දෙදෙනක අපහරණයට ලක් කළේ යැයි ඇසෙන්ජ්ට එරෙහිව චෝදනා එල්ල වී ඇති අතර ඒ සම්බන්ධයෙන් ස්වීඩනයේ නඩු විභාගයක් පැවැත්වෙයි. ඇසෙන්ජ් තම රටට බාර දෙන්නැයි ස්වීඩන රජය බි‍්‍රතාන්‍යයෙන් ඉල්ලා ඇති අතර බි‍්‍රතාන්‍ය රජය ඊට කැමැත්ත පළ කර ඇත. බි‍්‍රතාන්‍යයේ සිටිද්දී, රාජ්‍ය සහ හමුදා රහස් ලොවට හෙළි කිරීමේ වරදට දඬුවම් කර ඇසෙන්ජ්ගෙන් පළි ගැනීමට ඇමෙරිකාවට නුපුළුවන්ය. ස්වීඩනයට ගෙන්වා ගැනීමෙන් ඇමෙරිකාව තමන් අත්අඩංගුවට ගැනීමට සැරසෙන බව ඇසෙන්ජ් මෙන්ම ඔහුගේ නීතීඥ ගාර්සොන් ද පවසයි. ස්පාඤ්ඤ ජාතිකයකු වන ගාර්සොන්, හිටපු විනිසුරුවරයක් ද වෙයි. ඇසෙන්ජ් ලන්ඩන් නුවර එක්වදෝර තානාපති කාර්යාලයට ගොස් එක්වදෝරයේ දේශපාලන රැකවරණ ඉල්ලා සිටියේ එහෙයිනි. එක්වදෝර ජනපති ඇසෙන්ජ්ට තම රටේ දේශපාලන රැකවරණ ලබා දීමට ද කැමැත්ත පළ කර ඇත. කෙසේ නමුත් ඇසෙන්ජ්ට ලන්ඩන් නුවර එක්වදෝර තානාපති කාර්යාලයෙන් පිටවීමට නොහැකිය. ඇසෙන්ජ් ඉන් පිටතට පැමිණියහොත් අත්අඩංගුවට ගැනීමට ලන්ඩන් පොලිසිය සීරුවෙන් සිටී. මේ අතර ස්වීඩනයට බාරදීමෙන් වැළැකී, ලන්ඩන් නුවර එක්වදෝර් තානාපති කාර්යාලයේ සිටින විකිලීක්ස් සංස්කාරක වරයා සම්බන්ධයෙන් එක්වදෝර රජය සමඟ දිගින් දිගටම සාකච්ඡා පවත්වන බව බි‍්‍රතාන්‍ය විදේශ ලේකම් විලියම් හේග් පවසා ඇත. බල්තසාර් ගාර්සොන්