වත්මන් ආණ්ඩුව බලයට පත්වූ පසු ආගමික ස්ථාන කිහිපයක සිටි අලි ඇතුන් රජයේ භාරයට ගැනීම දැක ගත හැකි විය. මෙයට එරෙහිව විවිධ මතවාද මතු වූ අතර සමහරුන් කීවේ මේ නිසා පෙරහර සඳහා ද අලි ඇතුන් නැති වන බවය.

මේ සඳහා විසඳුමක් වනජීවී ඇමැති ගාමිණී ජයවික්‍රම පෙරේරා මහතා ඉකුත් සතියේ පැවැති කැබිනට් රැස්වීමට ඉදිරිපත් කළේය. ඔහුගේ යෝජනාව අනුව පින්නවල අලි අනාථාගාරයෙන් විහාරස්ථාන සඳහා අලි ලබාදෙයි. ඒ සඳහා රුපියල් මිලියනය ගණනක ඇපකරයක් වනජීවී අමාත්‍යාංශයේ තැබිය යුතුය. අලියාගේ වටිනාකම අනුව මිලියන එකේ සිට දහය දක්වා වැඩිවිය හැකි බවද ඇමැති ජයවික්‍රම කීවේය. අලියාගේ නීත්‍යානුකූල හිමිකාරිත්වය රජයට පැවරෙන අතර,  විහාරස්ථානයේ තබාගෙන අලියා නඩත්තු කරගත හැකිය. අලියාට ආහාර සැපයීම ඇතුළු නීති මාලාවකට ද අදාළ විහාරස්ථානය හෝ ආගමික ස්ථානය යටත් විය යුතුය. මෙම යෝජනාවට කැබිනට්ටුවේ අනුමැතිය හිමි විය. පසු පෙළ සිටි ඇමැතිවරයකු මේ සම්බන්ධයෙන් ඇමැති සගයකුට කීවේ “නොම්මර එකයි. ලක්ෂ දහයේ ලීස් එකට අලියා පන්සලට” කියාය.