ජනපති ජාතිය අමතයි 

(අජන්ත කුමාර අගලකඩ)   

 ලබන සැප්තැම්බර් මාසය වනවිට ජනතාවගෙන් එක්කෝටි තිස්ලක්ෂයකට කොවිඩ් මර්දන එන්නත් ලබාදෙන බව ජනාධිපති ගෝඨාභය රාජපක්ෂ මහතා ජාතිය අමතමින් පෙරේදා (25) රාත්‍රියේ ප්‍රකාශ කළේය.

වයස අවුරුදු 30ට වැඩි සියලු‍ දෙනාටම පාහේ ඒ වනවිට එන්නත් ලබා දී අවසන් කළ හැකිවනු ඇතැයි ද ජනාධිපතිවරයා කීවේය.   

 සමස්ත ජනගහණයෙන් ලක්ෂ 30කට එන්නත් ලබා දී අවසන් යැයි කී ජනාධිපතිවරයා අවශ්‍ය එන්නත් ප්‍රමාණය සෑම මසකම ලැබෙමින් පවතින බව ද සඳහන් කළේය.   

 ජනතාව තමා පත් කළේ රටේ අනාගතය පිළිබඳව විශාල බලාපොරොත්තු තබාගෙන යැයි කී ජනාධිපතිවරයා, කුමන අන්දමේ බරපතළ ප්‍රශ්න මැද්දේ වුව ද එම බලාපොරොත්තුව ඉටු කිරීමට තමා බැඳී සිටින බව ද කීවේය.

 රටට විශාල උවදුරක් බවට පත්වෙමින් තිබූ පාතාලය සාර්ථකව පාලනය කර ඇතැයි කී ජනාධිපතිවරයා, මත්ද්‍රව්‍ය උවදුර ද බොහෝ දුරට පාලනය කර ඇතැයි කීවේය. පාතාලය සම්පූර්ණයෙන්ම ඉවත් කිරීමේ වැඩපිළිවෙළක් ක්‍රියාත්මක කරන බව ද ඔහු පැවැසීය.   

 මේ අතර ඉදිරි මහ කන්නය සඳහා ගොවිතැනට අවශ්‍ය කාබනික පොහොර සියල්ල ලබාදෙන බවට රජය සහතික වන බව ද ජනාධිපතිවරයා සඳහන් කළේය.