(දයාසීලි ලියනගේ)   

පුත්තලම ආනවිළුන්දාව අභයභූමියේ කොටසක් ඩෝසර් යන්ත්‍ර යොදා විනාශ කිරීමේ සිද්ධියට දේශපාලකයකුගේ සහෝදරයෙක් සම්බන්ධ බවට චෝදනා එල්ලවී ඇත.   

ප්‍රාදේශීය දේශපාලන කටයුතුවල යෙදී සිටින මේ තැනැත්තා එක්තරා සභාවක හිටපු සභාපතිවරයෙක් බව ද කියති.   

රාජ්‍ය නිලධාරියකුට පහරදීමට තැත් කිරීම ඇතුළුව චෝදනා රාශියක් මෙම ප්‍රාදේශීය දේශපාලනඥයාට එල්ලවී තිබෙන බව ද සඳහන්ය.   

ආනවිළුන්දාව පරිසර පද්ධතිය වනජීවී නීතිය යටතේ අභය භූමියක් ලෙස ප්‍රකාශයට පත් කර ඇති අතර රැම්සා සම්මුතියට අනුව තෙත් බිම් පද්ධතියක් ලෙසට ප්‍රකාශයට පත්කර ඇති ප්‍රදේශයකි.   

මෙම විනාශය පිළිබඳව පුත්තලම සහකාර වනජීවී කාර්යාලය මගින් පසුගිය සිකුරාදා රජයට වාර්තාවක් ඉදිරිපත් කර තිබුණි.   

මේ සම්බන්ධයෙන් කළ විමසීමේ දී පුත්තලම සහකාර වනජීවී අධ්‍යක්ෂ එරන්ද ගමගේ මහතා ප්‍රකාශ කළේ සිද්ධිය පිළිබඳව විමර්ශනයක් කරමින් සිටින බවය. යන්ත්‍ර ක්‍රියාකරු හඳුනා ගැනීමට හා ඔහු සමඟ මෙම ක්‍රියාවලියට සම්බන්ධ බවට සැකකරන පුද්ගලයන් අධිකරණයට ඉදිරිපත් කිරීමට පියවර ගනිමින් සිටින බව ද එරන්ද ගමගේ මහතා ප්‍රකාශ කළේය.   

විමර්ෂණ කටයුතු අවසන් වන තුරු සිද්ධියට සම්බන්ධ අය ගැන ප්‍රකාශයක් කළ නොහැකි බව ද ඔහු කීය.