කියුබාවේ හිටපු ජනපති ෆිදෙල් කස්ත්‍රෝ 1962 සිට තනි නායකත්වය යටතේ රට පාලනය කළේය. එතුමාගේ ජන්මපත්‍රයේ සුවිශේෂී රාජයෝග කිහිපයක් තිබෙන බව පෙන්වා දිය යුතුය. කේන්ද්‍රස්ථාන හතරේම ග්‍රහයන් බලවත්ව පිහිටා තිබීම නිසා චතුස්සාගාර නම් වටිනා යෝගය පිහිටා ඇත.  

තුලා ලග්නයෙන් උපත ලැබුවේ ශනි ලග්න ගතව උච්චක්ෂේත්‍රව සස යෝගය උද‌ාවෙමින් තිබෙන අවස්ථාවකය. මේ නිසා දීර්ඝායු ලබන ශෝභා සම්පන්න සම්පූර්ණ ශරීරයෙන් යුත් වීර්යවන්ත, දේශපාලන ක්ෂේත්‍රයේ කැපී පෙනෙන, දුක් කම්කටොලු විඳ දරා ගැනීමට හැකි තැනැත්තෙකුමය. එසේම කෘෂිකර්මාන්තයටද දක්ෂතාවය ඇති කෙරිණි.  

මොහුගේ කේන්ද්‍රයේ ගුරු 4 වැන්නේ නීචව සිටි අතර එහි අධිපති ශනි ලග්න ගතව සිටීම නිසා නීචය භංග කර රාජ යෝගයක් උද‌ා කර ඇත.  

කුජ හෙවත් අඟහරු ලග්නෙන් 7 වැන්නේ ස්වක්ෂේත්‍ර බලයෙන් රුචක යෝගය උද‌ා කරමින් සිටින නිසා දැඩි අධිෂ්ඨාන ශක්තිය ඇති මහත් තේජස ඇති බලවත් මරුටත් බිය නැති නිර්භීත අයකු බවට පත් කරන ලදී. රවි දිග් බලයෙන් යුක්තව කටක රාශියේ (10 වැන්නේ) සිටින බැවින් සෑම අංශයකින්ම දැනුම්වත්භාවය ඇති පොතපතේ දැනුම මෙන්ම බාහිර සමාජයේ ක්‍රියාකාරීත්වය සහ අධ්‍යාපනයෙන් තමා ලබා ගත් දැනුම සමාජයේ පොදු යහපත උදෙසා යොදවා නිවැරදිව පාලනය කිරීමේ ශක්තිය ඇති පුද්ගලයෙකුද විය.  

මෙවැනි යෝග පිහිටන පුද්ගලයන් අභියෝග හමුවේ නොසැලී සිටින අයද වේ. ඉතාමත් කලාතුරකින් මෙවැනි යෝග පිහිටන අතර ඔවුහු කුමන ක්ෂේත්‍රයක හෝ කැපී පෙනෙන පුද්ගලයන් වෙති.  

වර්තමාන සමාජයේ රටවල් පාලනය කරන බොහෝ දෙනෙක් රටේ යහපත කෙසේ වෙතත් තම තමන්ගේ සංවර්ධනය උදෙසා නම් නොබියව ක්‍රියා කරති. මතු අනාගත පරපුර වෙනුවෙන්වත් රටට හිතැති පුද්ගලයෙකු බිහිකර ගැනීමට මෙවැනි ග්‍රහ බල පවතින අය ඇත්නම් ඔවුන් දේශපාලන ක්ෂේත්‍රයට යොමුවීමෙන් තම රටට විශාල සේවයක් ඉටුකළ හැකි බව කිව යුතුයි.  

ජන්ම පත්‍රය උපුටා ගැනීම (The astrological Magazine 1975 October) 
ජ්‍යොතිර්වේදී   
ඛේමා සුභාෂිණී වීරතුංග   
මාඉඹුල, නිට්ටඹුව