(දිලීප් ජයසේකර)

බිරිඳ සමඟ අනියම් ඇසුරක් ඇතැයි සැක සිතා සිය බේකරියේ සේවය කළ අවිවාහක අයෙකුට පොල්ලකින් ගසා ඝාතනය කිරීමේ වරද පිළිගත් පුද්ගලයෙකුට හම්බන්තොට මහාධිකරණ විනිසුරු තාමර තෙන්නකෝන් මහතා වසර හතක බරපතල වැඩ සහිත සිර දඩුවමක්, රුපියල් 10,000 ක දඩ මුදලක් හා රුපියල් ලක්ෂ 5 ක වන්දි මුදලක් ගෙවන ලෙස අද (24) නියෝග කළේය.

මෙලෙස සිර දඬුවම් හා දඩ නියම වුයේ දෙබරවැව පදිංචි සුරිආරච්චිගේ ප්‍රියන්ත නැමති  47 හැවිරිදි තිදෙරු පියෙකුටය.

සැකකරු 2010 ජුනි මස 06 දින රාත්‍රියේ බීමත්ව පැමිණ සිය බේකරියේ සේවය කළ අවිවාහක පුද්ගලයෙකු වූ  වෙහෙරගල තිස්සමහාරාම පදිංචි සංජීව ෆොන්සේකා නැමති අයට පොල්ලකින් පහර දී තිබේ.

පහරකෑමෙන් බරපතල තුවාල ලැබූ මරණකරු හම්බන්තොට මහ රෝහලට ඇතුළත් කර හදිසි ප්‍රථිකාර ඒකකයේ ප්‍රථිකාර ලබමින් සිටියදී 2010-06- 08 වන දින මරණයට පත්ව තිබේ.

සිද්ධිය සම්බන්ධයෙන් පරීක්ෂණ පැවැත්වූ තිස්සමහාරාම පොලිසිය සැකකරු අත්අඩංගුවට ගෙන අධිකරණය හමුවට ඉදිරිපත් කිරීමෙන් පසු සැකකරු රක්ෂිත බන්ධනාගාර ගත කර ඇත.

පසුව සැකකරුට එරෙහිව පැවති මූලික නඩු විභාගයෙන් පසු නීතිපතිවරයා විසින් සැකකරුට එරෙහිව හම්බන්තොට මහාධිකරණය හමුවේ අදිචෝදනා ගොනු කෙරුණි.

ඒ අනුව සැකකරුට එරෙහිව වසර 09 ක් තිස්සේ පැවති නඩු විභාගය අතරතුර සැකකරු වරද පිළිගැනීම හේතුවෙන් මහාධිකරණ විනිසුරු තාමර තෙන්නකෝන් මහතා සැකකරුට දඬුවම් නියම කෙරුණි‍.