(දිලීප් ජයසේකර)

සුරියවැව බැද්දෙවැව බටහිර ප්‍රදේශයේදී තියුණු ආයුධයකින් පහර දී දෙදරු මවක් අද (10) ඝාතනය කර ඇතැයි සුරියවැව පොලිසිය පවසයි.

මෙලෙස ඝාතනය කර ඇත්තේ බැද්දෙවැව බටහිර, සුරියවැව ලිපිනයේ පදිංචි 28 හැවිරිදි චමිලා ප්‍රියංගණී නැමති දෙදරු මවකි.

ඝාතනයට ලක් වූ කාන්තාවට ඇයගේ මහ ගෙදර අසල පදිංචි 65 හැවිරිදි පස් දරු පියෙකු විසින් අවස්ථා කිහිපයකදීම අයුතු යෝජනාවක් ගෙනවිත් ඇති අතර ඒ පිළිබඳව මෙම කාන්තාව සිය සැමියාට හා දෙමාපියන්ට පවසා තිබේ.

මේ හේතුව නිසා සැකකාර පුද්ගලයා මෙම කාන්තාව හා ඔවුන්ගේ දෙමාපියන් සමඟ අවස්ථා කිහිපයකදී ආරවුල් ඇති කරගෙන ඇත.

මෙම   කන්තාව නිවසේ රැඳී සිටින අවස්ථාවේ මෙම සැකකාර පුද්ගලයා ඇයගේ නිවසට පැමිණ කැමැත්ත විමසා තිබේ.එහිදි ඊට අකමැති වීම නිසා දෙදෙනා අතර බහින් බස්වීමක් ඇති වී ඇති අතර මෙම කාන්තාව විසින් අදාල පුද්ගලයාට පහරක් එල්ල කර තිබේ.

පසුව ඇය මේ පිළිබඳව ඇයගේ මවට පවසා ඇති අතර ඇයගේ මව මෙම සැකකාර පුද්ගලයාට බැන වැදී ඇත.මින් කෝපයට පත් මෙම පුද්ගලයා මෙම කාන්තාවගේ මහගෙදර සිට සිය නිවසට යමින් සිටින අවස්ථාවේ තියුණු ආයුධයකින් පහරදි ඝාතනය කර තිබේ.

ඝාතනයෙන් පසු සැකකරු ප්‍රදේශයෙන් පලා ගොස් තිබේ.

සිද්ධිය සම්බන්ධයෙන් වූ මහේස්ත්‍රාත් පරික්ෂණය හම්බන්තොට මහේස්ත්‍රාත් හා අතිරේක දිසා විනිසුරු නාලක සංජීව ජයසූරිය මහතා විසින් පැවැත් වූ අතර සිරුර පශ්චාත් මරණ පරීක්ෂණ කටයුතු සඳහා හම්බන්තොට මහ රෝහලේ විශේෂඥ අධිකරණ වෛද්‍ය නිලධාරීවරයා වෙත යොමු කිරීමට නියෝග කෙරුණි.