(මොහොමඩ් ආසික්)
 
 මක්කානිගම,  ගල්පිහිල්ල, ඊරියගස්තැන්න,  යකඩකුඹුරුවෙල, ඉහළගම, මෙරායා සහ  පුදුඩුවැල්ල යන ගම්මාන හතක ගම්වාසීහු පිරිසක් අද(03) මක්කානිම හන්දියේදී මාර්ග අවහිර කරමින් උද්ඝෝෂණයක නිරත වූහ.
 
 මහනුවර  දිස්ත්‍රික්කයේ කුණ්ඩසාලේ මැතිවරණ කොට්ඨාසයට අයත් පාතදුම්බර මැතිවරණ කොට්ඨාස මායිමේ පිහිටි ගම්මාන 7කට වැඩි ප්‍රමාණයකට ජලය  ලබා නොදීමට විරෝධය දක්වමින් ඔවුහු විරෝධතාවයේ යෙදුණහ.
 
 ජලය සැපයීම සඳහා මෙයට වසර 17 කට පමණ  පෙර සවි කරන ලද නළ පද්ධතිය දිරා පත් වෙමින් තිබුණත් තවමත් තමන්ට නළ ජලය ලැබී නැතැයි ඔවුහු පැවසූහ.
 
ප්‍රදේශයට එකම නළ ළිඳක් තිබෙන බවත් එහි ජලය මළකඩ පිරුණු ජලය බවත් ඉන්  වකුගඩු රෝග සෑදීමට ඉඩ ඇති බවත් ඔවුහු කියති.
 
 තම ජල ගැටළුවට සාධාරණ විසඳුමක් නොලැබුණහොත් ඉදිරියේදී මාරාන්තික උපවාසයක් අරඹන බව ගම්වාසීහු පැවසූහ.