(ජේ.කේ.එල් චාමින්ද)

දකුණු පළාතේ මහජන ආධාර හා රෝගාධාර ලබන පුද්ගලයින්ගේ අප්‍රේල් මස දීමනා මුදල් මේ වනවිටත් දකුණේ ප්‍රාදේශීය ලේකම් කාර්යාල වෙත යවා ඇති බව දකුණු පළාත් පරිවාස කොමසාරිස් මහේෂ් කරුණානායක මහතා පවසයි.

දකුණු පළාත තුල මහජන ආධාර ලාභින් 28000කට ආසන්න සංඛ්‍යාවක් හා රෝගාධාර ලබන පුද්ගලයින් 3900ක් සිටින බවද දකුණු පළාත් පරිවාස කොමසාරිස්වරයා පවසයි.

ප්‍රාදේශීය ලේකම්වරුන්ගේ මෙහෙයවිම යටතේ මේ වනවිට ග්‍රාම නිලධාරි වසම් මට්ටමින් ලේඛන සකස්කරගෙන යන බවත් එම ආධාර මුදල් ඉදිරියේ දි ලබාදිමට ප්‍රාදේශිය ලේකම්වරුන් විසින් සුදුසු වැඩපිළිවෙළක් සකස්කරමින් පවතින බවද පරිවාස කොමසාරිස් වරයා සදහන් කළේය.

දකුණු පළාතේ වැඩිහිටි නිවාසවල කිසිදු ආහාර හිගයක් නොමැති බව පවසන දකුණු පළාත් පරිවාස කොමසාරිස්වරයා දැනට සති දෙකකට පමණ අවශ්‍ය ආහාර තිබෙන බවද පවසයි.

පවතින ආහාර අවශ්‍යතාවය අනුව තවත් සති දෙකකට අවශ්‍ය වියලි ආහාර ද්‍රව්‍ය ගබඩාකර තබාගන්නා ලෙස සමාජ සේවා නිලධාරින්ට උපදෙස් ලබාදි ඇති බවද පරිවාස කොමසාරිස්වරයා සදහන් කළේය.

ඒ සදහා අවශ්‍ය මුදල් සමාජ සේවා දෙපාර්තමේන්තුව මගින් ලබාදෙන බව පවසන දකුණු පළාත් පරිවාස කොමසාරිස්වරයා දකුණු පළාතේ වැඩිහිටි නිවාස 49ක වැඩිහිටියන් 1600 පමණ සිටින බවද සදහන් කළේය.